Pasko na sa Carbon

Subay sa temang “Panaghi-usa Ipadayon Alang sa Nasugdang Kalambuan,” pormal na nga gisugdan ang pagsa-ulog sa “Carbon Pasko Na” karong tuiga.

Kini pinaagi sa usa ka grand launching niadtong Disyembre 1, 2015 adlawng Martes. Ang kalihokan gisugdan ug usa ka parada sa tanang mga Vendor’s Association ug gisundan kini ug usa ka Santos nga Misa ug programa diin gipahigayon ang seremonyal nga pagpasiga sa mga Christmas lights sa Carbon Market Area.

Sa pakighinabi sa BARUGG News, gibutyag ni City Market Administrator Raquel Arce nga ang kalihokan inisyatiba ni Mayor Michael Rama aron sa pagpanindot sa Carbon ug paghatag ug kahigayon sa mga mamalitay ug manindahay nga maka-apil sa ‘Misa de Gallo’ didto mismo sa Carbon Market.

Dugang gipadayag ni Arce nga ang kalihokan anaa na sa ika-napulo ka tuig karon ug kabahin niini ang 9 ka adlaw nga ‘Misa de Gallo’ kon ‘Simbang Gabi’ nga ipahigayon sa alas-4 sa kaadlawon sugod karong Disyembre 16 adlawng Miyerkules hangtod sa Disyembre 24 adlawng Huwebes.

Gipaambit usab ni Joni Chan, ang executive director sa UMC4 nga nagpadayon ang kalihokan uban sa pag-abag ug pag-atiman sa pribadong sektor pinaagi sa tinguha ni Mayor Rama alang sa usa ka ‘People-privately driven governance.’

Dugang pa, ang kalihokan regular usab nga gisuportahan sa liboan ka mga katawhan gikan sa mga manindahay sa Carbon, mga bisita, sponsors ug uban pa. (Cebu City Public Information Office PIO/Greggy Jiggs P. Senados)