Pagbubu sa Kuarta, Inisyal nga Positibong Epekto sa APEC sa Sugbo

(PIA 7 Cebu) —- Mibubo na ug kuarta sa Sugbo og bisan sa kasikbit nga lalawigan, ang epekto sa pagpahigayon sa mga tigum sa Asia Pacific Conference (APEC) dinhi.

Kini mao ang taho sa duha sa mga ahensya nga maoy labing nalambigit sa mga prepaprasyon alang sa APEC meetings.

Matod ni Department of Trade and Industry (DTI) regional director Asteria Caberte, labing busy karon ug bisan pa saw ala pa magsugod ang APEC, ang mga micro small and medium enterprises (MSMEs).

Kini tungod sa kusog nga panginahanglan sa mga produkto sama sa mga furnitures, fashion accessories, mga baskets og uban pa.

Gikan pa gani sa Bohol ang uban nga mga native products nga maoy giangkat sa mga taga Sugbo.

Lakip napod niini ang mga abot sa mga local nga mga mananumay og mag uuma sama sa mga utanon og lamas nga maoy gipanggamit sa mga kan-anan og mga hotels.

Daghan usab ang trabaho nga giablihan og kalit sa mga hotels og restaurants tungod sa APEC.

Matod ni Caberte, ang usa ka langyaw mugasto og labing menos $100 matag adlaw way labot sa iyang bayrunon sa gipuy-an.

Ang mga delegado nga naa sa Sugbo karon mukabot na og duol duha ka libo.

Sa laing bahin sa Department of Tourism Regional Director Rowena Montecillo nagkanayon nga daghan kaayo nga mga delegado ang mipalit sa mga local tours.

Gani sa milabay nga napulo ka mga adlaw, mikabat na og 49 ka mga local tours ang napahigayon, nga naglangkob og 107 delegates.

Matag usa kanila, matod ni Montecillo, mibayad og P2500 ngadto sa P3500 sa local tour.

Ang mga tour naglangkob og Cebu City Tour, Twin City Tours og ang countryside tour.

Ang APEC meetings mudagan pa ngadto sa Septembre 11. Adunay 87 ka mga tigum ang ipahigayon dinhi sa Sugbo. (fcc/PIA7-Cebu)