Pag-uma, Palambuon sa Kagamhanan

Padayon nga nangita og mga paagi ang gobyerno aron mapalambo ang sektor sa mag-uuma sa nasud ug maka-amot kini og daku sa nasudnong ekonomya, magbaton og igong supply sa pagkaon ug masumpo ang mga ma-anomaliyang transaksyon sa pag-angkat og bugas.

Matud pa ni Kalihim Herminio “Sonny” Coloma, Jr. sa Presidential Communications Operations Office (PCOO) sa usa ka press briefing, nga gituki og maayo sa Cabinet Economic Cluster ang mga pamaagi unsaon kini pagpalambo.

Giingong nabiyaan na sa manufacturing ug services ang sektor sa pang-uma ug gusto sa gobyerno nga makatabang kini sa ubang sektor sa natad sa pag-amot sa nasudnong ekonomya.

“Gani niadtong 2013, ang Gross Domestic Product (GDP) nisaka sa 7.2 porsiyento ug ang na-amot lamang sa sektor sa panguma 1.1 porsiyento lamang nga ubos kaayo kun itandi sa sektor sa services ug manufacturing,” matud pa ni Coloma.

Gibutyag sa Kalihim nga basin kinahanglan ang maayong reporma aron mapalambo ang ani ug aron maka-amot kini og daku sa kinatibuk-ang paglambo sa ekonomya sa nasud, dungan sa pagsumpo sa mga anomaliya sa pag-angkat og pagkaon.

Aron mahunong ang mga anomaliya sa pag-angkat og bugas, miingon si Coloma nga ang Department of Agriculture (DA) pinaagi sa National Food Authority Council, nagdesisyon nga ihunong ang gipanghatag nga mga pribilehiyo sa mga kooperatiba ug mag-uuma nga walay katakos nga mo-angkat og bugas.

Nangandam na karon ang DA sa bag-ong sumbanan sa pag-angkat og bugas aron matapalan ang mga buho sa kasamtangang sistema nga napahimoslan sa mga abusadong negosyante.

Dili lamang ang pagbaton og igong supply sa pagkaon ug dili lamang ang pagsiguro sa igong bugas sa nasud ang hatagan og pagtagad sa administrasyon, apan lakip na ang tibuok sektor sa panguma.