NFA 7 Nanglangkat og Lisensya sa Malapasong Retailer

Ubay-ubay na sa mga rice retailer sa National Food Authority (NFA)-7 dinhi sa Sugbo ang nalangkatan sa ilang lisensiya sa pagbaligya og NFA rice human masakpi sa mga monitoring team sa NFA-7 nga mipasaka sa prisyo sa gisitar.

Ang tigpamaba sa NFA-7 Ma. Lucia Rosales nagkanayon nga P2 hangtud sa P3 ang gipatong sa naasoy nga mga NFA retailers sa ilang gimandato nga P27 lamang nga prisyo sa NFA rice.

Matud pa ni Rosales nga nasayran sa ilang price monitoring team nga ang naasoy nga mga NFA rice retailer misakay sa panahon nga taas ang prisyo sa mga nag-unang mga commercial rice hinungdan nga gipasaka usab niini ang prisyo sa NFA rice.

Kini bisan pa man og kalapasan kini sa nasabutan sa accreditation sa NFA nga kinahanglan nga sundon ang gisitar nga prisyo sa NFA rice ug nga ang kalapasan niini nagpasabot nga malangkatan sila sa ilang accreditation.

Si Rosales mipahibawo nga base sa kamandoan sa labaw nga buhatan, diretso na ang paglangkat sa accreditation sa mga NFA rice retailer kay higpit nilang gituman ang “one strike policy” nga nagpasabot nga bisan makausa ka lamang nakalapas langkatan dayon kini sa accreditation ug did-an na sa pagbaligya og NFA rice.

Gawas sa pagpaumento sa prisyo sa NFA rice, laing gimonitor nga kalapasan sa mga retailer mao ang diversion kun pagtago una sa nakomprang NFA rice ug ibaligya sa mosunod na nga mga adlaw uban sa lahi nga prisyo.

Nagdumili hinuon kini sa pagtug-an sa mga rice retailer nga nakalapas sa lagda sa ilang buhatan apan iyang gitataw nga sagad sa nakalapas gikan sa mga lagyong dapit dinhi sa syudad sa Sugbo.

Gipasabot ni Rosales nga ang katuyoan sa NFA sa pagsilot dayon sa maong mga rice retailers mao nga “kaprotektahan ang interes sa mga konsumedor” gikan sa mapahimuslanon nga mga retailer ug ingon man pagpabahar sa mahal nga prisyo sa bugas sa merkado sanglit may mapilian man ang mga tawo nga mas barato nga prisyo sa bugas nga humay.

Dugang pa ni Rosales nga gitarget karon sa ilang monitoring team ang mga dagkong mga tindahan dinhi sa Sugbo ug sa ubang probinsya sa Central Visayas.