‘National Disaster Consciousness Month’ Saulogon sa OCD ning Buwan sa Hulyo

Saulogon sa Office of Civil Defense (OCD) 7 ang National Disaster Consciousness Month karong bulana, Hulyo.

Ang buhatan ni OCD-7 Regional Director Olivia Luces nagkanayon nga gisugdan nila kagahapon ang maong kasaulogan didto sa Plaza Sugbo, diin dipasabot nila sa publiko ang kamahinungdanon sa pagmatngon ug pagpangandam sa posibling pag-abot sa kalamidad dinhi sa Sugbo ug ubang mga lugar sa Visayas.

Gilab-as sa grupo ang kadako sa kadaot nga gibilin sa 7.2 magnitude nga linog nga miigo sa Cebu ug Bohol ug sa bagyong Yolanda nga milampurnas sa Leyte, Samar ug amihanang bahin sa lalawigan sa Sugbo sa miaging tuig.

Gisugdan usab sa mga sakop sa OCD-7 ang pagpang-apod-apod sa mga flyers diin makita ang mga detalye bahin sa pagmatngon aron malikayan ang kadaot nga posibling bunga sa mga kalamidad.

Gipahibalo usab sa OCD-7 nga mopahigayon usab sila og Calamity Summit sa lalawigan sa Bohol, Siquijor, Negros Oriental ug sa Cebu sulod niining bulana uban ang abag sa nagkadaiyang buhatan sa gobyerno.

Kini aron ma-update usab ang mga programa nga ilang isugyot ngadto sa tanang mga local government units unsaon pagtubag ang mga kalamidad nga posibling moigo sa ilang tagsa-tagsa ka lugar.

Ang tema sa kasaulogan sa National Disaster Consciousness Month niining bulana, mao ang “Kahandaan at Kaligtasan ng Pamayanan Pundasyon ng Kaunlaran.”