Mga Badlongon nga Drayber Gipangsikop

Dugang unom ka giingong badlongon nga drayber sa mga passenger jeepneys nga nag-atubang og kaso sa hukmanan gipangdakup sa milabayng adlaw sa mga traffic enforcers.

Si Joy Tumulak, operations officer sa City Traffic Operations Management (CITOM), miingon nga gipangita pa nila ang uban sa 32 ka mga drayber nga giisyuhan og bench warrant sa hukmanan.

Ang unom nga nadakpan mao sila si Venerando Raganas, Maximo Guevarra, Christopher Delaganar, Leonardo Salaguste ug Renante Inot nga mga nagpuyo sa lainlaing dapit sa dakbayan.

Matud ni Tumulak nga si Campo nga taga Talisay adunay wala kabayri nga multahan nga kapin sa P96,000 tungod kay nadakpan siya ka 195 ka higayon sa lainlaing kalapasan batok sa tukmang pagmaneho’g sakyanan.

Si Raganas nga taga Bulacao may multahan nga P160,500 tungod kay nadakpan siya og ka 335 ka higayon, samtang si Guevarra may wala kabayri nga multa nga miabut og P101,300 dihang nadakpan siya 250 ka higayon.

Ang drayber nga si Delaganar may multahanan nga P118,200 tungod kay 223 ka higayon nga siya nadakpan, ug si Salaguete may wala kabayri nga multahan nga P94,500 samtang si Inot, P24,800.

Kaniadtong Huwebes sa hapon nadakpan usab si Darwin Lareta nga adunay multahanan nga P89,000 tungod sa iyang 222 ka higayon nga nadakpan sa paglapas sa balaud sa tukmang pagmaneho.

Ang maong mga drayber human madakpi giisyuhan og Traffic Citation Tickets (TCT) apan wala kini magtagad sa pagbayad sa ilang multahan tungod kay wala man sakmita ang ilang lisensya.