Konseho Mitugut na sa mga Proyekto Batok Baha

Ang Cebu City Council mihatag og pagtugot ni Mayor Michael Rama nga makapirma og kontrata sa mga kontraktor aron kasugdan na ang pagmugna sa lainlaing proyekto nga kantidad og P53 milyones, apil na ang pagpugong nga mahitabo ang paglunop ug pagbaha dinhi sa dakbayan.

Apil sa mao nga mga proyekto nga gihatagan og “go signal” sa konseho mao ang mga drainage projects, ang uban mga slope protection nga magpugong sa pagdahili sa yuta diha sa kabukiran.

Ang pag-aprobar sa City Council sa mao nga mga proyekto gihimo pipila ka adlaw human nga si Mayor Michael Rama mipahibalo nga ibutyag niya sa katawhan kon unsa ang mga proyekto nga matud niya “giyak-an” ra sa mga konsehal.

Si Konsehal Roberto Cabarrubias maoy miduso sa mao nga mga resolusyon sa lainlaing proyekto sanglit siya ang tsirman sa committee on infrastructure sa Cebu City Council.

Matud ni Konsehal Margarita “Margot” Osmeña nga dili sila mobabag sa mga gitinguha nga proyekto ni Rama kon kini kompleto lang sa mga gikinahanglan nga mga dukomento.

Nahibaw-an nga daghan nga mga infrastructure projects nga wala dayon napatuman bisan ug nagahinan na og budget tungod sa problema nga anha kini moagi sa mga pribadong luna u gang dakbayan dugay nga nakakuha og pagtugot sa mga tag-iya sa yuta.

Ang ubang giplano nga proyekto naabtan pa gani og tuig nga wala gayud kahimoi og Program of Works and Estimates (POWE) mao nga ang konseho usahay moingon nga anugon lang nga gahinan og budget ang proyekto nga dili mapatuman sa tibuok tuig.

Gawas sa mga slope protection projects, pagsemento sa mga karsada ug paghimo og mga foot bridge nga gisugyot ni Konsehal Cabarrubias kagahapon, gisugyot usab niya ang mga drainage projects nga kantidad og kapin sa P15 million.

Ang mga drainage projects anaa kini mahimutang sa lainlaing mga sitio sa barangay Ermita, San Nicolas Proper, Barangays Luz, Mambaling, Paril, Kinasang-an, Lusaran, Basak Pardo, ug Basak San Nicolas.

Giawhag sa konseho si City Engineer Jose Marie Poblete paghatag og report nga magtataw nga ang mao nga mga proyekto wala pa mapahigayon. Ang P53 milyones nga proyekto gastohan gikan sa P100-million nga lump sum appropriation alang sa drainage projects nga giaprobahan sa konseho niadto pa nga 2012.

Ang dakbayan sa Sugbo sa miaging semana gibahaan ug gilunopan diha nga mibunok ang kusog kaayo nga uwan. Mga tagdumala sa 10 ka balay-patigayon nga anaa gitukod sa sapa, apil diha sa Colon, gipadad-an na og Notices of Violation sa City Hall ug gimandoan nga ipaguba.

Si Konsehal Margot Osmeña mi-deliver og privilege speech atol sa sesyon ug mitataw nga daghang drainage projects nga bisan og may budget na apan wala ipatuman sa mayor.

Gitumbok ni Osmeña mao ang P300 milyones nga budget nga kabahin sa pundo alang unta sa Mahiga Creek Improvement, apan gi-realign ni Mayor Rama alang sa pagpatukod sa bag-ong building sa Cebu City Medical Center.

Apan si Mayor Rama midepensa sa iyang gihimo pinaagi sa pagpasupot og pangutana. Matud sa mayor nga angay’ng timbang-timbangon kon asa ang palabihon ang pagsulbad sa baha o ang pagtagad kinabuhi sa katawhan nga walay ospital nga kaduolan.