Inayawan Landfill Hingpit na’ng Masirad-an

Ang Cebu City Council mihukom nga mopahigayon og executive session karong Oktobre 16 aron hisgutan ang mga pamaagi alang sa hingpit na gayud nga pagtak-op sa operation sa Inayawan Sanitary Landfill.

Nauyonan kini human nga si Konsehal Nida Cabrera, pangulo sa Committee on Environment sa Cebu City Council, mihimo’g privilege speech atul sa ilang sesyon.

Matud ni Cabrera nga kaganiadtong Miyerkoles tangkud gayud nga 15 ka tuig human gimugna ug gisugdan pag-operate ang Inayawan Sanitary Landfill sa dakbayan kaniadtong Septiembre 11, 1998.

Ang maong landfill nga nahimutang daplin sa dagat may gidak-on nga 16 hektareyas og kalabayan lang unta og mga basura sulod sa pito ka tuig apan gigamit kini sa dakbayan sulod sa kapin sa napulo ka tuig.

Si Cabrera nagkanayon nga bisan og si Mayor Michael Rama miisyu og closure order og wala na mopagamit sa landfill kaniadtong Abril 2011, apan padayon gihapon kini nga gigamit.

Ang mga basura nga wala mabuwag kadtong malata ug ang dili malata anha bahig-bahiga sa mga kawani sa Department of Public Services (DPS) sa dili pa ilabay ngadto sa private landfill sa Consolacion.

Matud ni Cabrera nga nabantayan niya nga wala gayo’y programa ang kagamhanan sa dakbayan kabahin sa pagsirado na sa hingpit sa maong landfill aron kapugngan nga makahatag kini og kadaut sa panglawas sa katawhan.

Si Cabrera nagkanayon nga namatikdan nila nga ang average level sa makahilo nga duga sa mga basura sa Inayawan Sanitary Landfill naghinubra ug makadaut kini sa kalikupan.

Ang maong dapit duol sa dagat og peligro nga makamugna kini og kadaut sa mga marine lives, ingon man sa kadagatan.

Atul sa executive session karong Oktobre 16, ipatawag sa mga konsehal ang kadagkoan sa Department of Public Services (DPS) nga maoy nagdumala sa paghakut sa mga basura dinhi sa dakbayan ug sa Department of Health (DOH) aron sutaon ang kadaut nga mahimo sa panglawas tungod sa mga duga sa basura.