Gahin Alang sa Gastohon sa Tribu Lumad Basakanon Gibasura sa Konseho

Gibasura g’yud sa konseho sa dakbayan sa Sugbo ang sugyot nga pagahinan og salapi ang Tribu Lumad Basakanon aron gastohon sa pagsalmot nila sa Aliwan Festival sa Manila og nga ang kwarta adto ibanon sa Pagcor Funds.

Matud ni Cebu City Councilor Margarita “Margot” Osmeña, pangulo sa Committee on Budget and Finance, nga ang pagasto sa kwarta nga gikan sa Pagcor alang sa kalihukan nga kulturanhon wala gayud maapil sa lagda.

Ang Philippine Amusement and Gaming Corporation (Pagcor) maoy mihimo sa lagda nga ang tag P3 milyones nga ihatag nila sa dakbayan sa Sugbo matag buwan gastohon ra basi sa gilatid nila nga lagda.

Apil niini ang pagamit sa kwarta alang sa pagpalambo sa panglawas sa katawhan, pagpatunhay sa kahusay ug kalinaw sama sa paghatag og abag ngadto sa kapolisan, kabomberohan ug sa bilanggoan.

Dunay uban nga gastohan nga gilatid sa lagda apan matud ni Konsehal Osmeña nga wala gayud maapil ang “cultural activities.” Apan si Mayor Michael Rama miingon nga dugay na nga panahon nga ang dakbayan mogasto gayud sa Tribu Lumad Basakanon aron makasalmot sa Aliwan Festival.

Ang Aliwan Festival nga buot salmotan sa Lumad Basakanon pagahimoon karong Abril 11 ngadto sa 13 adto sa Cultural Center of the Philipppines sa Manila.

Tulo ka milyon ka pesos ang gipangayo nga kantidad alang sa Tribu Lumad Basakanon aron gastohon alang sa pletehan sa mga 300 ka sumasalmot sa grupo ug sa ilang pagkaon.

Matud ni Osmeña nga kon adunay bag-ong dukomento nga mapresentar nga uyonan sa Pagcor ang maong gastohan alang sa Tribu Lumad Basakanon, ang iyang komitiba andam nga motuman.

Ang tribu Lumad Basakanon nahimo na nga kampyon sa Aliwan Festival makatulo ka higayon kaniadtong 2005, 2006 ug 2007 atul sa termino ni kanhi Mayor ug karon Kongresista Tomas R. Osmeña.