DPWH Patubagon sa Konseho

Nahukman sa mga sakop sa Cebu City Council nga ipatawag nila ang mga opisyal sa Department of Public Works and Highways (DPWH) aron nga patubagon kabahin sa daghang palpak sa pagtrabaho sa ilang mga gikuha nga kontraktor.

Ang City Council mopatawag sa kadagkoan sa DPWH aron sukit-sukiton atol sa sesyon karong Abril 14 kabahin sa pagpang-aspalto sa karsada nga gisaway sa daghan nga mga motorista.

Ang mga konsehal sa dakbayan miapil na pagsaway sa pagpangguba sa mga karsada dinhi sa dakbayan nga gihimo sa DPWH aron aspaltohon apan ang uban gibiyaan sa ilang kontraktor nga wala dayon gihuman.

Ang karsada atubangan sa Marco Polo Hotel giguba kapin na sa duha ka semana ug wala pa giaspalto sa kontraktor nga gikuha sa DPWH.

Si Konsehal Gerardo Carillo mihimo og privilege speech atol sa sesyon sa City Council kagahapon nga mipadayag usab og pagduda kay ang giawhag sa mga opisyal sa dakbayan mao ang pagpalapad sa mga karsada apan pagpang-aspalto lang ang gihimo sa DPWH.

Giawhag nga moatubang sa sesyon mao ang DPWH district engineer nga si Fernando Cruz, kanhi district engineer Nicomedes Leonor ug ang city engineer.

Ang Cebu City Development Council (CDC) mi-endorso ngadto sa DPWH og road widening sa ubay-ubay’ng mga karsada sama sa Bacayan- Pit-os road; Talamban-Bacayan road ug Banilad-Talamban sa North District ug V. Rama Avenue-Lahug; Natalio Bacalso Ave (Kinasang-an – Bulacao); C. Padilla St. (T. Abella st.-South Road Properties) ug Salvador St. sa South District nga mogasto og kapin P2 Bilyones.

Matud ni Carillo nga ang ilang gikinahanglan mao ang pagpalapad sa karsada dili kay ang pagpang-aspalto diin ang mga maayo pa nga karsada tuyuon sa pagguba aron usbon sa pag-aspalto.

Gitataw usab ni Carillo nga duna’y ubang proyekto nga gipatuman sa DPWH nga wala’y koordinasyon sa mga opisyal sa dakbayan nga kalapasan sa Section 25 sa Local Government Code.

Si Joy Tumulak nga maoy operations chief sa CITOM mitataw nga gikasabotan g’yud nga dili biyaan ang giguba sa DPWH contractors.

Sa laing bahin, gisaway pag-ayo sa Cebu City Council ang gihimo sa DPWH nga pagpamutol sa 88 ka kahoy nga gipatubo sa center island sa Sergio Osmeña Avenue kabahin sa padayon’g road rehabilitation project.

Matud ni Konsehal Nida Cabrera, pangulo sa Committee on Environment, nga ang gihimo sa kontraktor sa DPWH usa ka kalapasan sa environmental laws.

Ang mga opisyal sa DPWH patubagon niini nga isyu atol sa pagpatawag kanila sa special session nga ipahigayon unya sa Abril 14 nga magtuki usab kabahin sa pagguba sa karsada nga maayo pa aron ayuhon pag-usab.

Si Bise Mayor Edgardo Labella misuporta ni Cabrera nga ang DPWH nakalapas sa balaod. Giimbitar sa City Council ang WT Construction ug si DPWH-7 District Engineer Fernando Cruz nga motambong sa executive session.

Giawhag sa City Council ang DENR-CENRO nga mopahigayon og imbestigasyon aron masuta kinsa ang sad-an sa maong pagpamutol sa mga kahoy.