DOH 7: Pagbantay sa mga Duwaang Makahilo

Ning nagkaduol nga kasaulogan sa Pasko, gipasidan-an sa mga tinugyanan sa Department of Health (DOH)7 ang mga ginikanan nga likayan ang pagpamalit og mga duwaan sa ilang mga gagmayng anak nga kargado sa pintal nga makahilo.

Sumala ni Assistant Regional Director Dr. Lakshmi Legaspi sa DOH 7 nga nakadawat sila og advisory gikan sa World Health Organization (WHO) bahin sa peligro kaayong mga duwaan sa mga bata nga gipakatap sa kamerkadohan sa Pilipinas nga gikan sa China.

Nasuta sa mga pagsulay nga gipahigayon sa mga batid, nga kasagaran sa maong mga duwaang plastik kargado kaayo sa “lead”, matang sa pintora nga makamugna og kanser sa lawas sa tawo nga makahigop niini.

Busa higpit nga gidili karon sa DOH 7 ang pagbaligya niining maong mga duwaan sa mga tindahan nga paborito sa katawhan.

“Apan kun ugaling may mga tindahan nga nag-display niini nga wala ma-check sa mga otoridad sa DOH, mas maayong likayan sa publiko ug angay nga dili na kini paliton,” matud pa ni Legaspi.

Ang maong pasidaan gipalanog ni Legaspi aron malikay sa kadaot sa lawas ang mga kabataan.

Wala usab mapakgang sa mga negosyante ang pagpasulod sa maong mga produkto nga nagbaha dinhi sa nasud sa pagtuo nga kini maayo ug dili makadaot sa lawas.

Apan dihang nasuta sa mga otoridad ang ka-peligro niining mga produktoha, diha-diha milihok dayon ang DOH pagpahibawo sa publiko bahin niining mga produktoha.

Image Credit: www.thehindu.com