DOE, Mipasalig Nga Igo Ang Supply Sa Kuryente Sa Mayo 9

Gipasalig sa Department of Energy (DOE) nga igo ang supply sa kuryente alang sa Mayo 9 automated elections.

Apan bisan pa niini, mihangyo si DOE Kalihim Zenaida Monsada sa publiko nga limitahan gihapon ang kunsumo sa kuryente.

Gitataw sa Kalihim nga ang taas nga demand sa kuryente karon tungod sa grabeng init nga dala sa summer season ug El Niño phenomenon.

Matud pa ni Monsada, may pipila ka power plants sa nasud ang naa na karon sa preventive maintenance aron masiguro nga mogana sila sa dili pa ug sa mismong adlaw sa piniliay.

Gidugang usab sa Kalihim nga gibantayan nila karon ang deklarasyon sa ‘red alert’ sa National Grid Corporation of the Philippines (NGCP).

Giingong kun mahitabo kini, ang mga pribadong kumpanya nga may kaugalingong mga generator kinahanglang mosunod sa Interruptible Load Program (ILP).

Ubos sa maong programa, ang mga pribadong kumpanya mogamit sa ilang generators aron dili na mokuha pa og kuryente sa mga power grid.

Una nang nagdeklarar og ‘yellow alert’ ang NGCP sa Luzon ug Visayas grids tungod sa kakulang sa energy reserve.

Ang DOE nipagawas na og circular alang sa pagmugna og Power Task Force Election (PTFE) 2016 nga motutok sa pagsiguro sa igo nga supply sa kuryente sa dili pa, samtang, ug human sa piniliay. (ecb/PIA7-Bohol)