Dali, Duterte, Dagan

Daghan na kaayong tawo kanimo mikumbinser
Nga ikaw gayud ilang himuong nasudnong lider.
Unsa’y imung gilangayan?
Ikaw man among buligan.
Dali, Duterte, dagan!
Ikaw amo g’yung pasaligan!

Tanang mga Bisaya naghandum nga ikaw
Niining kapupud-an ang imung kaisog mupatigbabaw
Aron kabag-uhan, paglambo ug kalinaw
Sa tibook tang banwa unya damlag mutumaw.
Dali, Duterte, dagan!
Ikaw amo gayud butaran!

Dinhi sa Pilipinas, sigehan lang tag pasalig
Sa mga pulitikong maayo ra mupa-alig-alig.
Sila nga ang puhunan laway,
Kita nahimutang taliwa sa mga pagsuway.
Dali, Duterte, dagan!
Ang Malakanyang imung gingharian.

Ang Dabaw nahimong ihimplo sa uban,
Nga usa ka lungsod sa kaanindot sumbanan.
Samtang didtu ikaw nagsugpo sa krimen ug drugas,
Kagubot ug kawad-on sa ubang bahin sa Pilipinas.
Dali, Duterte, dagan!
Ang Dabaw, imu nang biyaan!

Kung ang imung gipaabot ang PDP-Laban,
Dili maguol: kaming katawhan ikaw ang dapigan.
Kung ikaw sa kwarta ug makinarya nahadlok,
Uy, kanang kontra-partido kadaghanan mga uplok.
Dali, Duterte, dagan!
Kanimu ang tinuoray nga kabag-uhan!