COMELEC Voter’s Registration Molungtad Hangtod sa Oktubre 31

Subay sa Commission on Elections (COMELEC) Resolution No. 9853 molungtad hangtod na sa Oktubre 31, 2015 ang pagparehistro alang sa Mayo 2016 nga piniliay.

Giawhag ang tanang buot magparehistro sa pag-adto sa buhatan sa Cebu City North og South District nga perehong anaa nahimutang sa First Floor sa WDC Building sa dalan Osmena Boulevard ning syudad.

Ang pagparehistro sa COMELEC alang sa mga first timers ug sa mga narehistrong bontante nga wala pay biometrics ug sa magpabalhin ug rehistro kon transfer of voter’s registration.

Naglakip usab sa pagrehistro ang reactivation sa voter’s registration alang sa mga wala nakabotar sa milabayng duha ka eleksyon hinungdan nga na-deactivate ilang records. Lakip usab nga itanyag ang correction of entries alang sa adunay kabilinggan sa ilang pangalan ug ubang detalye sa pagparehistro.

Sa pakighinabi sa BARUGG News kang Atty. Marchel Sarno, ang election officer sa Cebu City North District, gibutyag niini nga motaas pa ang mga rehistradong botante sa dakbayan sa Sugbo ngadto sa 5 hangtod 10 porsyento sukad sa pagsugod sa voters registration niadtong Mayo 6, 2014 hangtod sa katapusang adlaw.

Gibutyag usab ni Sarno nga adunay gipahigayon nga mga satellite voters registration ngadto sa mga nagkadaiyang mga kabarangayan ning syudad.

“Mintras layo pa ang October 31 parehistro namo,” asoy usab ni Atty. Edwin Cadungog ang election officer sa Cebu City South District agig pag-awhag sa mga buot magparehistro aron dili maghuot ug mahasol sa taas nga linya sa last minute.

Ang duha ka mga election officers ning syudad parehong mitataw nga automated o computerized ang piniliay karong Mayo 9, 2016 ug dili mobalik sa manual voting gumikan sa Election Modernization Law.

Sa pagsuwat ning balita ang dakbayan sa Sugbo adunay 578,703 na ka mga rehistradong botante, diin 307,341 niini ang gikan sa 34 ka mga barangays sa Habagatang Distrito ug 271,362 ang gikan usab sa 46 ka mga Barangays sa Amihanang Distrito.

Dugang pa, abli ang buhatan sa COMELEC matag Lunes hangtod Biyernes sa alas-8 sa buntag hangtod na sa alas-5 sa hapon.(Cebu City Public Information Office PIO/Greggy Jiggs P. Senados)