Campo Dagohoy Mipasalig Di Magpataka og Panakop

Gipasalig sa hepe sa kapolisan sa tibuok Bohol nga dili sila magpataka og panakop sa mga gidudahang nahilambigit sa illegal nga drugas.

Kini bisan pa nga ang pagbukas sa Operation Double Barrel Alpha sugod sa Octubre 27, magpahimutang sa usa ka quota alang sa kapolisan sa tibuok Bohol.

Segun sa taho, kinahanglang makadakop ang mga kapolisan sa 4,606 ka suspitsadong nahilambigit sa bisan unsang paagi sa illegal nga drugas hangtud sa Disyembre 31. Kini usab mipaturok sa kahingawa sa mga sakop sa Provincial Peace and Order Council (PPOC) nga mahimong tungod sa kadaghan sa kinahanglang ma-accomplish, basin may pagpataka na lang nga mahitabo.

Gibungat sa sakop sa PPOC nga si Romeo Teruel, nga unta ang kampanya batok sa druga, dili ilhon sa kadaghan sa tawo nga madakpan. Apan, gipasalig ni PSSupt Felipe Natividad sa Kampo Dagohoy nga dili sila desperado nga mao na kanay buhaton.

Gidason usab sa Kampo Dagohoy nga ang kampanya batok sa drugas nia na sa ang-ang sa paglimpyo, kanus-a, halos wala na gayuy mga lumilihok sa illegal nga drugas nga nagsige pa sa ilang buhat. Kini usab bisan pa nga ang kapolisan, maningkamot gihapon nga igkita kadtong mga personalidad nga nangkagiw na human masayud nga lakip gyud sila sa lista sa mga naduhig sa illegal nga drugas.

Didto sa PPOC, gipadayag ni Natividad nga segun sa ilang datus, gikan sa Octobre 28, mas daghan ang ilang na-account nga misurrender ug maaresto kay sa ilang gihimo-an og tinuyo nga operasyon. Dungan usab niini, gibutyag sa kapolisan nga dungan sa pagsugod sa Double Barrel Alpha, mas panegurohon sa kapolisan ang paglimpryo aron ikadeklara na ang kalungsuran nga luwas na sa hilga sa drugas.(rac/PIA-7/Bohol)