‘Zero Casualty’ sa Pasko, Target sa DOH 7

“Zero casualty”, maoy target sa kagamhanan nga nag-atiman sa panglawas sa katawhan alang sa umaabot nga Pasko ug pagsugat sa bagong tuig.

Apan tungod sa nagkalainlaing pabuto nga gitugot sa kagamhanan nga ibaligya ngadto sa publiko niining mga panahona, murag lisod matuman ang maong pangandoy, sumala sa Department of Health (DOH)7.

Si Dr. Expedito Medalla sa DOH7 nagkanayun nga Mao gyuy ilang gusto nga unta way mapungkol, mabakol, mabungi, ug mabulhog o kaha mamatay niining paskoha.

Iyang gihinganlan ang mga pabuto sama sa kuwetes, triangle, hotdog ug uban pang sama kasipa sa dinamita nga kun mahiduol ang tawo, kasagaran mapungkol ug dili mamatay.

“Aw kun magkompiyansa ang tawo sigurado gyud nga mausab ang iyang apelyido sa liwas sa Pasko ug bag-ong tuig,” Sumala pa ni Medalla.

May mga pabuto usab nga makahilo ang pulbora kun malamoy sa bata tungod sa matang sa materyal nga gigamit sa pabrika niini.

Busa iyang giawhag ang publiko nga “magbantay o angay maglikay sa pabuto aron nga mosugat sa bag-ong tuig nga kompleto gihapon ang lawas ug labaw sa tanan may kinabuhi pa”, matud pa ni Medalla.