Yuta sa Dakbayan, Sakmitun

Daghang tag-iya og kayutaan nga gisakmit na sa kagamhanan sa dakbayan sa Sugbo tungod kay wala magpakabana pagbayad sa ilang buhis, karon gusto na nga paliton nila pagbalik ang ilang property.

Gisumiter ni Cebu City Treasurer Diwa Cuevas ngadto sa Cebu City Council ang lista sa 36 ka tag-iya sa kayutaan nga nakunpiskar na sa kagamhanan sa dakbayan sa Sugbo.

Ang mga konsehal sa dakbayan mitugyan pa hinuon niini’ng mao nga isyu ngadto sa Committee on Laws aron kahimoan og pagtuon kun angayan ba nga tugotan ang mga tag-iya paglukat pagbalik sa ilang mga yuta.

Aduna’y uban nga mipadayag og kaandam nga bay’ran nila ang kinatibuk-an nga kantidad base sa pagsubasta sa dakbayan sa Sugbo tungod sa buhis nga wala nila maatiman.

Ang Local Government Code nagtugot sa mga probinsya, dakbayan ug mga lungsod nga mohimo og “public auction” sa mga real property units sama sa kayutaan, building ug makinarya nga wala na bayari ang buhis sa ilang mga tag-iya.

Kun atol sa pagsubasta wala’y interesado nga mopalit, diha-diha maisip kini nga ang local government units nga nagpahigayon sa public bidding maoy nakapalit.

Ang mga tag-iya sa property nga gi-auction tungod sa buhis nga wala kabayri, gihatagan og katungod nga sulod sa usa ka tuig malukat nila pagbalik ang ilang katigayonan nga naimbargo na.

Apan daghan sa mga tag-iya og property nga wala gihapon mag-atiman og milapas na ang “one year redemption period” og dili na sila makapugos nga lukaton pagbalik ang ilang kabtangan.