‘Wilderness and Protected Area’ sa Bantayan Island, Buot Libkason

Gihandos na sa Regional Development Council (RDC)7 ngadto sa kongreso ang plano alang sa isla sa Bantayan nga gitawag og Bantayan Island Wilderness Area General Management Plan (BIWA-GMP) nga gigama sa Department of Environment and Natural Resources (DENR)7 atol sa tigum nila didto sa Siquijor sa miaging adlaw.

Kini human aprobahi ang Protected Area Management Board (PAMB) sa maong isla nga giduso usab sa Provincial Development Council (PDC) sa Cebu.

Ang General management Plan(GMP)nagklasipikar sa isla ngadto sa usa ka sona nga ampinganan busa angay kining tawgon nga usa ka lugar sa kamingawan human kini lumpaga sa bagyong Yolanda sa miaging tuig sumala pa sa resolution sa RDC.

Nasuta nga ubos sa Presidential Proclamation No. 2151 (PP No. 2151), ang isla sa Bantayan Island giklasipikar nga iya sa kagamhanan nga dili angay mahilabtan ni kinsa man,sumala sa pagpamatuod ni anhing Presidente Ferdinand Marcos niadtong tuig 1981.

Gumikan sa maong Presidential Proclamation, wala’y pribadong tawo nga gitugotang makapanag-iya og bahin sa kayutaan sa tibuok isla sa Bantayan.

Busa sa rekomendasyon sa RDC7, gihangyo niini ang kongreso nga libkason na ang pagka-“wilderness and protected area sa maong lugar aron makapatukod na sa ilang mga balay ang katawhan ug ingon man mahibalik ang kalihukang pamatigayon human kini kuso-kusoa sa Yolanda.

Ang BIWA-GMP nagpasabot nga ipadayon ang higpit nga pag-alima sa mga bakhawan, tinubdan sa tubig ug ang itloganan sa mga pawikan nga anaa sa gidak-ong 596 ka ektarya.

Samtang ang kapin sa 10,000 ka ektarya sa maong isla gigahin alang sa kaumahan, kalasangan, panginabuhian ug ingon man kalingawan ilabi na sa turismo.

Sumala sa resolusyon sa RDC, giisip niini nga walay kapuslanan ang ilang paningkamot kun ang isla magpabilin pa gihapon diha sa usa ka lugar nga protektado sa gobyerno.

Hinungdan nga ang RDC-Economic Development Committee (RDC-EDC) misuporta sa pagpahandos dayon sa maong rekomendasyon ngadto sa kalihim sa DENR ug sa ubos balay balaoranan alang sa dinaliang pagpatuman sa maong balaod.