Walay Na-Positibo sa Drug Test sa mga Pulis

Walay bisan usa sa 50 ka polis sa Mandaue nga gipakalitan og drugtest nga napositibo sa gidili nga matang sa drugas. Susama usab niini ang resulta sa surprise drugtest sa mga sakop sa Intelligence Branch sa Cebu Provincial Police Office.

Ang kadagkoan sa Mandaue City Police Office (MCPO) nagpahigayon og kinalit nga drug test ngadto sa 50 nila ka polis aron pagsuta kun kinsa kanila ang nalambigit sa paggamit og illegal nga drugas.

Si Superintendent Crisaleo Tolentino, deputy director for operation sa MCPO, miingon nga ang mga sakop sa City Intelligence Branch, City Anti-Illegal Drugs Special Operation Task Group, administration personnel ug ang mga police station chief maoy gipaubos og surprise drug test.

Matud ni Tolentino nga si MCPO director Petroneli Baldebrin nakahukom sa pagpasiugda og kinalit nga drug test sa ilang mga polis sa pagsuta kon kinsa kanila ang mga adik.

Ang kagamhanan sa Mandaue maoy mipadala og medical personnel gikan sa City Health department nga maoy mihimo sa drug test.

Ang maayo nga balita mao nga wala’y bisan usa sa 50 ka polis nga gihimoan og random drugtest nga napositibo sa gidili nga matang sa ilegal nga drugas.