Wala Gi-Override

Wala gi-override sa Cebu City Council ang gi-veto ni Mayor Michael Rama nga ordinansa nga nagtugot unta sa kahugpongan sa mga lumulopyo nga maoy makadumala sa inaptan nga sports complex sa Sitio Manggahan nga sakop sa Barangay Punta Princesa.

Nalipay si Mayor Rama nga ang mga sakop sa konseho nga kadaghanan kanila sakop sa Bando Osmeña Pundok-Kauswagan (BOPK) nga dakung sayop ang ilang lakang pagtugot sa mga opisyal sa Sitio Manggahan Homeowners Association nga maoy modumala sa sports complex.

Matud sa mayor nga wala niya aprobahi ang ordinansa kay nasayud siya nga dakung sayop ang gihimo sa mga konsehal nga ang butang sa kagamhanan ipadumala sa kahugpongan nga sibilyan.

Ubos sa balaud ang mga sakop sa konseho makahimo pagbaliwala sa veto sa mayor kon ang two third sa ilang gidaghanon, nagpasabot nga labing minus 12 sa mga konsehal, mobotar sa pagsupak sa iyang lakang.

Ang konseho gilangkoban sa 18 ka konsehal, apil ang ex-officio members nga nag-representar sa mga opisyal sa barangay ug kabatan-onan, ug 14 kanila ang mga alyado sa BOPK nga kontra sa mayor.

Matud ni Rama nga sigurado nga mag-atubang og kaso ang mga konsehal nga mipalabang sa maong ordinansa kon sila mo-insistir pa nga ilang i-override ang iyang veto power.

Gusto ni Rama nga ang sports complex nga gigastohan og kwarta sa kagamhanan ipadumala sa mga opisyal sa barangay Punta Princesa nga ang kapitan iyang kaalyado.