VSMMC: Kapin Otso Mil ka Estudyante Nabakunaha’g Anti-Cancer

Mikabat sa 8,122 ka mga babayeng estudyante sa grade four sa 44 ka tulunghaang publiko sa Sugbo ang nabakunahan na og anti-cervical cancer matud pa ni Dr. Eugenia Mercedes Canal sa Department of Health Regional Office (DOH)-7.

Matud pa ni Dr. Canal nga ang maong mga tulunghaan maoy silbing gihimong ‘pilot area’ sa DOH central office pagpaniid kun unsa kalig-on ang mga babaye batok sa cervical cancer kun mabakunahan og medisina batok sa maong sakit.

Iyang gitug-an nga gawas sa maong mga eskuylahan, wala nay laing lugar dinhi sa nasud nga gihimong pilot area sama dinhi sa Sugbo.

Giila ni Canal ang maong mga tulunghaan nga mao ang 14 sa Cebu City, 9 sa Mandaue, 9 sa LapuLapu, 4 sa Talisay, ug uban pang dapit sa lalawigan.

Nasuta ang cervical cancer nga maoy ikaduhang matang sa sakit sa nasud nga mokutlo og labing daghan ang makabsan sa kinabuhi.
Gani gibutyag ni Dr. Marybeth delos Santos sa OB Gyne sa Vicente Sotto Memorial Medical Center (VSMMC) nga sa matag 24 oras, 12 ka babaye ang mamatay tungod sa cervical cancer dinhi ss nasud.

Kasagarang bation sa babaye mao ang panakit sa pus-on, dayon sa bat-ang, maglisud na sa pagkalibang ug pangihi, kanunay magdugo ang kinatawo ug baho usab kini, sumala si Delos Santos.

Midugang siya nga usa sa mga hinungdan niining cervical cancer mao ang pakighilawas og lainlaing tawo.

Gawas niini, ang pakighilawas sa mga babaye nga 13 hangtud 17 anyos pa lang, usa usab sa mahimong hinungdan sa maong sakit.

Mao man gani nga giawhag ni Delos ang matag babaye nga unta likayan ang pakighilawas og sayo ug subra sa usa ka lalaki aron dili masugamak sa cervical cancer.

Gituyo usab sa kagamhanan ang pagpabakuna sa mga Grade V nga babaye kay gisiguro nila nga wala pa kini makasuway sa pakighilawas.

Midugang si Delos Santos nga ning tibuok buwan sa Mayo, saulogon sa nasud ang cervical cancer month ug dinhi sa Cebu ipahigayon nila ang usa ka pasunding gikan sa Fuente Osmeña oval paingon sa Capitol diin matag mosalmot giawhag niya nga magsul-ob og pula nga T-Shirt.

Kining tanan aron pagdani sa daghang kababayen-an nga mag-amping tungod sa ka-peligro sa cervical cancer.

Hinuon matud pa niya nga mas labing maayo nga matag tuig mas maayo nga magpahiling gyud sa lawas ang matag babaye nga may edad nga 20 anyos pataas aron masayran kun wa ba siya matapti og cervical cancer.

Matud pa ni Delos Santos nga matambalan pa ang cervical cancer basta bag-o pa kini sa lawas sa babaye apan kun dugay gani nga ipahiling, kasagaran ulahi na ang tanan, matud pa ni Delos Santos.