Uyoan Nag-atubang og Kasong Pagpanglugos

Dalagita nga gikatahong gilugos mibakho pag-ayo samtang nagtan-aw og salida sa telebisyon nga adunay eksena nga pagpanglugos mao nga nahibaw-an nga ang dalagita giamong-amongan diay sa uyoan.

Ang 14-anyos nga dalagita didto gikatahong gilugos sa balay sa suspetsado nga si Carmelo Secretaria, 52, ug nagpuyo sa Barangay San Roque, Talisay City.

Giandaman na sa kapolisan og kaso nga pagpanglugos si Secretaria aron ipasaka sa hukmanan.

Matud sa dalagita nga gilugos siya ni Secretaria dihang 11 pa ang iyang pangedaron.

Ang maong biktima giubanan sa iyang inahan dihang misumbong sa Talisay City Police Station (TCPS) Women and Children Protection Desk.

Si PO3 Violeta Godinez sa WCPD mibutyag nga ang dalagita gisukit-sukit sa iyang apohan ngano nga mitiyabaw kini samtang mitan-aw sa salida sa TV nga dunay eksena nga lugos.

Dinhi gitug-an sa dalagita nga biktima diay usab siya sa pagpanglugos kaniadtong Mayo 11, 2011. Tungod sa kahadlok, ang biktima wala dayon mosumbong ngadto sa iyang apohan kinsa maoy nag-atiman kaniya.

Karong buwana, gisaulog sa nasud ang Women’s Month.