Utlang: Driver sa Truck nga Nadisgrasya sa Carcar, Dako’g Tulobagon

Ang kanhi Cebu City Veterinarian ug karon pangulo sa Cebu City Office for Substance Abuse Prevention (COSAP) Dr. Alice Utlang mibutyag nga gawas sa kalapasan sa lagda sa trapiko, nakalapas usab sa Republic Act 8485 nga naila nga Animal Welfare Act of 1998 si Mario Panulagan, ang driver ug operator sa trak de karga nga nabangga didto sa sitio Mabugnao, barangay Guadalupe syudad sa Carcar sa milabayng adlaw nga mikalas na og 9 ka mga kinabuhi.

Kini kun ang trak de karga niini nga gisakyan sa mga kahayupan gikan sa Mantalungon lungsod sa Dalaguete paingon na sa syudad sa Carcar wala marehistro sa Department of Agriculture (DA-7) nga kargahanan sa mga livestock.

Sigon pa ni Utlang nga ang balaod nga naglantaw sa kaayohan ug proteksyon sa mga kahayopan nagtumbok nga ang pagkarga ug pagdiskarga sa mga hayop sa sakyanan magkinahanglan og pagtugot sa DA-7, busa kinahanglan kining iparehistro.

Samtang gipahibawo usab ni Utlang nga ang negosyante usab og buhing kahayopan sama sa mamalit og mobaligya og baboy, baka ug ubang hayop, ilabina sa pagbiyahe niini sa laing lugar, magkinahanglan usab kini og linsensiya ingon man permiso gikan gihapon sa DA.

Kini sama usab sa mga negosyante sa karne nga magkinahanglan gihapon og permiso gikan sa ahensiya sa kagamhanan sa pagbiyahe sa mga baligya niini paingon sa laing lugar.

Gipasabot usab ni Utlang nga sigon sa maong balaod P5 mil ang multa sa mga tawo nga nakalapas niini.