Unit 2 Bldg. Sugdan Karong Semanaha

Sugdan na karong Martes ang pagtukod sa Carbon Market Unit 2 building pinaagi sa Geety Realty and Construction Company.

Mao kini ang gibutyag ni Raquel Arce, ang Market Administrator sa dakbayan sa Sugbo, nga mipahibalo nga mihatag na sila og laing Notice to Proceed ngadto sa kontraktor.

Andam na unta ang Geety Construction nga motukod sa Carbon Market mga duha ka buwan ang milabay apan ang mga opisyal sa dakbayan sa Sugbo mismo maoy mihangyo nga iangan-angan usa kini kay wala pa mapapahawa ang mga nag-ukopar sa luna sa Unit 2.

Ang mga tindera nga nag-ukopar sa luna nga alang sa Unit 2 sa Carbon Market anaa karon gipahimutang sa Quezon Boulevard, ang karsada nga nahimutang luyo sa Carbon public market.

Dihang nasunog ang Sitio Bato, ang mga nasunogan maoy una nga nakaukopar sa karsada og hinungdan nga gipahunong usa sa mga opisyal sa dakbayan ang pagsugod pagtukod sa Carbon market building.

Ang dakbayan nakapagahin na og P170 milyones alang sa pagtukod sa Carbon Market Unit 2, apan hinoon gihulagway nga pun-anan pa ang maong kantidad.

Ang karaang Carbon Market Unit 2 building nasunog kaniadtong 1998 atul sa termino ni kanhi mayor Alvin Garcia. Ang pagtukod sa building gi-award na unta ngadto sa Young Builders Corporation apan wala ipatuman dihang milingkud na si kanhi Mayor Tomas Osmeña.

Wala makagusto si Osmeña sa design sa maong building kay ang gusto niya mao nga ang ibabaw nga bahin sa building mahimong kaparkingan og mga sakyanan sa tumong nga maminus-minos ang problema sa traffic congestion sa Carbon area.