UK Nanginahanglan og Kapin sa 500 Pinoy Nurses

(PIA) — Nanginahanglan ang United Kingdom (UK) og kapin sa 500 Pilipino Registered Nurse (RN).

Matud pa ni Department of Labor and Employment (DOLE) Kalihim Rosalinda Baldos, nakadawat ang Philippine Overseas Labor Office (POLO) sa UK og walo ka job order gikan sa nagkalain-laing Foreign Placement Agency (FPA) alang sa kinatibuk-ang 554 nurse.

Mokuha ang FPA nga Search Recruitment Limited og 180 RN samtang ang Medicare Staffing Limited nangita og 60 RN. Ibutang ang mga mapiling nurse sa Northwest London Hospital, Gloucestershire Hospital ug Kingston Hospital nga mga National Health Service (NHS) Trusts.

Samtang ang upat pa ka FPA nga Pure Health Staffing Limited, Job Connections UK Limited, Sky Care Health Limited ug More Medical Associates Limited, nanginahanglan og 314 nurse. Ibutang ang mga mapiling aplikante sa mga pribadong care homes nga Rushcliffe Care Group, Gold Care Homes Limited, Bond Care Limited ug Four Seasons.

Ang mga bag-ong job order katumbas sa 38% nga pagsaka sa demand alang sa mga Pilipinong nurse dungan sa pag-edad ug pagkunhod sa gidaghanon sa mga RN sa maong nasud.

Mahimong bisitahon ang website nga The Philippine Embassy in London alang sa uban pang detalye kalabot sa proseso sa aplikasyon. (ecb/PIA7-Bohol)

Image Credit: www.pinoy-ofw.com