Tweddell Nanguna sa Delegasyong Australiano

Gipangunahan ni Australian Ambassador to the Philippines Bill Tweddell ang pagduaw sa mga kadagkuan sa Australian Parliamentary sa lalawigan sa Bohol niadtong adlawng Myerkules.

Uban usab ni Tweddell si Australian House of Representatives Deputy Speaker Bruce Scott nga mibutyag nga ang Bohol maoy nag-inusarang lalawigan lamang sa Pilipinas nga ilang giduaw gawas sa kaulohan tungod kay nabati nila nga kabahin na sila sa katilingbang Bol-anon.

Ang delegasyon sa Australia naglakip nilang Senator for South Australia Don Farrell, Senator for Victoria Helen Kroger, Member of the Parliament for Bruce, Victoria Alan Griffin, Member for Hasluck, Western Australia Ken Wyatt, Adviser to the Deputy Speaker Elysia Ruttley, Peter Banson (ang kalihim sa delegasyon) ug ang asawa ni Scott nga si Joan.

Lima ka bulan human gitay-og ang Bohol sa 7.2 magnitude nga linog, ang kagamhanan sa Australia nakahatag na og P366 ka milyon (A$9 milyon) alang sa diha-dihang hinabang sa nagpadayong recovery ug reconstruction sa lalawigan.

Uban usab ni Gob. Edgar Chatto, gisugdan kagahapon ang paghatag og pagtagad sa P275 ka milyon nga rehabilitation project nga naglakip sa 14 ka nag-unang kadalanan sa Bohol nga gibuligan sa kagamhanan sa Australia. Ang maong bulig pinaagi sa Australian Assistance for International Development (AusAID), dili lamang alang sa pagpahiuli sa kinatibuk-ang 124.62 kilometro sa kadalanan, apan apil na usab ang kasamtangang kahigayonan sa panginabuhi sa 115,000 ka Bol-anon nga nahimutang sa mga beneficiary areas.

Ang maong grupo naglakip usab sa mga opisyal sa Philippine Provincial Road Management Facility (PRMF) Program nga gi-abagan usab sa AusAID.

Ang ceremonial groundbreaking gihimo sa tunga sa dalan nga nag-atubang sa barangay hall sa Bungahan, Antequera, usa sa 14 ka dalan nga ayuhon–ang Antequera-Balilihan road agi sa Dorol.

Ang ubang 13 ka road sections nga nalakip sa Australian-aided rehabilitation program mao ang Poblacion Inabanga-Lawis road, Inabanga-Lapacan-Magtangtang road, Candumayao-Cabanugan road, Poblacion Catigbian-Rizal-Kagawasan (San Isidro) road, Cahayag (Tubigon)-Banlasan-Cabanugan road, Calape-Pangangan road, Tajang-Sandingan road, Alegria (Catigbian)-Baang-Jagbuaya-Janopol road.

Lakip pud niini ang Abatan-Agahay-Busao-Toril-Aghao road, Hinawanan (Loay)-Concepcion-Junction (Loboc-Sikatuna) road, Cambuac (Sikatuna)-Lobgob (Sevilla) road, Jct (LIR)-Quinoguitan-Sevilla-Janopol road , ug ang Dimiao-Oac-Bilar road.

Image Credit: r07.pia.gov.ph