TRO Gibasura, Demolisyon Padayun

Gikatagda nga karong buntag ipadayon ang pagpangguba sa kabalayan sa Sitio San Miguel, Barangay Apas nga nahimutang sa yuta nga giangkong iya ni Aletha Suico-Magat.

Duha lang sa 157 ka balay nga nahimutang sa duha ka luna nga gipanag-iya ni Magat maoy naguba sa mga sakop sa demolition team nga gi-hire sa court sheriff nga mipatuman sa kamandoan sa hukmaman.

Si Judge Pamela Baring-Uy sa Municipal Trial Court in Cities (MTCC) maoy mimando nga gub-on ang kabalayan nga nahimutang sa yuta nga gipanag-iya ni Magat.

Gibasura sa hukmanan ang gipangayo nga Temporary Restraining Order (RTC) sa mga apektado nga pamilya aron unta pugngan ang pagpatuman sa demolisyon nga gimando ni Judge Uy.

Gisugdan ang demolisyon lapas ang alas dos kagahapon, Martes sa hapon human nga si Regional Trial Court (RTC) Judge Alexander Acosta mibasura sa Petition for TRO nga gi-apply sa mga abogado sa City Hall ug ni Atty. Benjamin Militar.

Gihunong ang demolisyon bisan og wala pa ang alas tres sa hapon kay ang court sheriff miuyon sa hangyo ni Barangay Kapitan Ramil Ayuman nga hunongon usa ang pagpangguba sa kabalayan.

Ang mga tag-iya sa kabalayan walay nahimo gawas sa pagpanghilak nga nagsud-ong sa gipangguba nga kabalayan.

Karong buntag, Myerkules, si Kapitan Ayuman miingon nga babagan g’yud nila ang pagpadayon sa pagpangguba sa kabalayan tungod sa duna pa’y pending nga Motion for Injunction with a Prayer for a TRO nga gidali-dali pagpasaka sa abogado.

Ang mga molupyo maghimo og “human barricades” aron suwayan pagpapugong sa pagpadayon sa pagpangguba sa ilang kabalayan.

Image Credit: philstar.com