Tricycle na Walay Prangkisa, Kuyanap sa Mandaue

Daw nagduwa og “Cat and Mouse” ang mga traffic enforcers sa Mandaue og ang mga tag-iya’g traysikol nga walay prangkisa.

Matud sa uban nga kun anaa ang mga traffic enforcers, ang mga tag-iya’g traysikol nga walay prangkisa dili usab mopadagan, apan kun mopauli na ang mga enforcer sa gabii, anha na sila mo-operate.

Apan mas grabe ang impormasyon nga nahipos sa MetroCebuNews kay dunay mga traffic enforcers nga bisan nasayod nga walay papeles ang nagdagan-dagan nga traysikol, ila ra kini nga gipasagdan.

Hangtud karon wala pa gayud masumpo kining pagpadagan og mga traysikol nga walay mga prangkisa nga nagtugot sa mga tag-iya niini nga gamiton ang ilang sakyanan alang sa pagpamasahero.

Si Joebert “Bong” Nemenzo, tsirman sa National Confederation of Tricycle Operator’s and Driver’s Association of the Philippines (NACTODAP), miangkon nga daghang traysikol nagbiyahe sa Consolacion,
Cordova, ug sa mga dakbayan sa Mandaue ug Lapu-Lapu nga walay prangkisa.

Base sa lagda, ang mga tag-iya og traysikol adto mokuha og prangkisa sa mayor, pinaagi sa Tricycle Regulatory Board sa mga dapit nga asa sila gusto nga mobiyahe. Gitataw hinoon ni Nemenzo nga dili niya sakop ang ubang tag-iya sa mga traysikol nga kulorum. Matud niya nga ang mga traffic enforcer lang maoy
gibantayan sa mga drayber kay mobiyahe man kini bisan asa nga rota.

Si Nemenzo miingon nga sa dakbayan sa Mandaue, ang mga walay prangkisa nga traysikol anha magbalik-balik sa ilang biyahe sa hilit nga mga karsada sa kabarangayan nga minus ang mga traffic enforcer.

Ang dakbayan sa Mandaue adunay 20 ka kahugpongan sa mga tricycle driver ug operator nga ubos sa NACTODAP ug hugtanon gayud niya nga gipahimangnoan nga kinahanglang may prangkisa g’yud ang ilang sakyanan.

Susama nga pahimangno ang gihatag ni Nemenzo sa 23 ka asosasyon sa mga tricycle driver ug operators sa dakbayan sa Lapu-Lapu.

Matud ni Nemenzo nga dali ra ilhon ang mga tricycle sa Mandaue nga walay prangkisa kay ang legal nga namasahero makita man sa atubangan sa side car ang giplastada nga business plate.

Ang mga tag-iya’g tricycle sa Lapu-Lapu nakasinati og problema kay sa higayon nga ilang ibaligya ang ilang tricycle dili man malakip pagbaligya ang prangkisa nga ilang gihuptan kay bakwion man kini sa
kagamhanan sa maong dakbayan.

Sukwahi kini sa sitwasyon sa Mandaue nga kun ang tricycle ibaligya sa tag-iya apil na ang iyang prangkisa nga giisyu sa dakbayan.

Si Edwin Ermac nga maoy operation chief sa Traffic Enforcement Agency of Mandaue (TEAM) miingon nga ang 2,000 ka tricycle sa dakbayan mao lamang gayud ang gitugotan pagpamasahero sa lainlaing rota sa
kabarangayan.

Aduna hinoo’y uban nga walay prangkisa nga wala maapil sa ihap ni Ermac kay adto ra kini magdagan sa hilit nga dapit, ilabi na panahon sa gabii.