Trapik sa Banilad-Talamban Bout Ibanan sa Citom

Ang tsirman sa City Traffic Operations Management (CITOM) Board nga si Ruben Almendras mitug-an nga nagpatabang sila kanila ni Gobernador Hilario Davide Jr. ug Mayor Michael Rama sa paghangyo sa kadagkoan sa AFP Central Command nga paagion ang mga sakyanan sa karsada nga anaa molagbas sa ilang kampo.

Matud ni Almendras nga usa kini sa dinalian nga paagi nga maiban-ibanan ang problema sa trapiko diha sa Banilad-Talamban Road nga kanunay’ng makasinati og kahuot sa mga sakyanan.

Si CITOM Executive Director Rafael Christopher Yap mitataw nga gitukod ang Mariano Cuenco Avenue nga naila nga Banilad-Talamban Road nga walay kompleto nga pagtoon kay kini ra maoy agianan ug gawasanan sa mga sakyanan paingon sa Talamban.

Ang sunod nga karsada nga kaagian sa mga sakyanan tua na sa Hernan Cortes Avenue nga sakop na sa Mandaue. Tungod sa pagdagsang sa mga subdivision sa Talamban ug Banilad, ingon man sa uban pang kanait nga barangay, nagpunsisok ang mga sakyanan nga anha moagi sa gitawag og Bantal Road.

Gisugyot sa CITOM nga unta ang Camp Lapulapu nga maoy headquarters sa militar sa Kabisay-an biyaan na unta sa militar aron ang lugar magamit nga kahimoan og karsada.

Matud ni Almendras nga dili tukma nga ang kampo sa militar anaa mahimutang sa siyudad. Apan sanglit madugay pa man ang pagpapahawa sa militar, matud ni Almendras nga ang ilang tumong mao nga matugotan lang unta ang mga sakyanan nga moagi sa kampo.

Sa pagka karon pinili ra ang mga sakyanan nga makasulod sa kampo ug walay labot ang mga pangpubliko nga sakyanan. Nagtoo ang CITOM nga kon kaagian na ang Camp Lapulapu sa mga sakyanan mominus gayud ang problema sa Bantal-Road.