Training sa ‘Bantay Lasang’ Malampuson-Montejo

Gibutyag sa Department of Environment and Natural Resource (DENR)-7 nga nagmalampuson ang ilang gipahigayon nga training alang sa mga myembro sa “Bantay Lasang” o ang mga tawo nga magbantay sa mga kakahoyan ug kalasangan dinhi sa Central Visayas aron paglikay sa forest fire o sunog sa kakahuyan.

Sigon pa ni DENR-7 Executive Regional Director Isabelo Montejo nga mikabat sa 365 ka mga myembro sa naasoy nga grupo nga gisalmotan usab sa ubay-ubay nga people’s organization, Philippine Army, Barangay officials ug mga forest guard.

Matud pa ni Montejo nga dinhi sa Sugbo ang maong training gipahigayon didto sa barangay Daanlungsod sa lungsod sa Oslob niadtong Abril 11 hangtud sa Abril 12.

Samtang didto sa Ubay, Bohol gipahigayon usab niadtong Abril 14 hangtud sa Abril 16, ug sa Negros Oriental gipahigayon didto sa Ayungon sa Abril 21 ug 22, Dumaguete city niadtong Abril 23, ug sa Siaton sa Abril 24 hangtud sa Abril 25 ning tuiga.

Nagkanayon si Montejo nga ang maong pagbansaybansay naglangkob sa “forest fire behavior, forest fire control, fire suppression tactics and techniques, tools, safety and welfare.”

Dugang pa niya nga atol sa naasoy nga training na-demonstrate ang tukmang paagi sa paggamit sa mga ekipo sa bombero lakip na ang “fire suppression techniques.”

Image Credit: www.ecoagrifoundation.org