‘Towing’ Giplanohang Ibalik

Ang Executive Committee sa Cebu City Traffic Operations Management (CITOM) nagplano karon sa pagsugyot nga mokuha sila pagbalik og pribado nga towing company nga moabag kanila paghimo’g kampanya batok sa mga motorista nga magpataka lang pag-parking sa ilang sakyanan.

Mao kini ang gibutyag ni Jonathan “Joy” Tumulak, ang operations officer sa CITOM, kinsa nakabantay nga nagkadaghan ang mga motorista nga magpataka na lang pagparking sa ilang mga sakyanan nga usahay ibabag pa sa aseras.

Si Tumulak miingon nga dili maato sa ilang usa ka tow vehicle ang pagpangguyod niining maong mga sakyanan mao nga manginahanglan sila og private towing company nga makaabag kanila sa mao nga gimbuhaton.

Gitataw hinoon ni Tumulak nga aduna pa’y ubang pamaagi nga angayang hisgutan pag-ayo sama sa paagi nga ang mga private towing company dili tugutan nga mosuroy aron mangita og mga sakyanan nga ilang guroyon.

Matud ni Tumulak nga ang una nga gihisgutan mao nga ang mga private towing company nga kuhaon sa CITOM magpaabot lang og mga tawag gikan sa CITOM kon asa ang mga sakyanan nga ilang guroyon.

Ang towing operation dinhi sa dakbayan sa Sugbo paspas kaayo atul sa administrasyon ni kanhi mayor Tomas Osmeña apan gipahunong kini dihang si Mayor Michael Rama miasumier na sa katungdanan.

Ang pamaagi kaniadto mao nga bisan tuod og ang private towing company mopasuroy sa ilang mga tow vehicles sa dakbayan sa Sugbo apan aduna kini kauban nga mga sakop sa CITOM.

Miingon si Tumulak nga hisgutan pa kini nila sa pagdugang ang maong isyu ug kon unsa’y masabotan sa executive committee, iduso kini ngadto sa CITOM Board, ug dayon ngadto na sa City Council.

Kaniadto ang mga tag-iya og sakyanan mobayad og P2,500 kon maguyod ang ilang four-wheel nga sakyanan, P1,500 sa mga motorsiklo nga makarga ug mas mahal sa mga sakyanan nga subra sa upat ang ligid.