Tomas Pabor sa Pagbawi sa P56 Milyones nga Gibayad sa mga Rallos

Pabor si Kanhi Mayor Tomas R. Osmeña nga ang kagamhanan sa dakbayan mohimo’g lakang legal aron mabawi ang P56 milyones nga gibayad ngadto sa pamilya’ng Rallos diha’ng siya pa ang mayor.

Reaksyon kini ni Osmeña sa tinguha ni Mayor Michael Rama nga bawion ang dako’ng kantidad nga salapi nga gibayad sa dakbayan sa Sugbo ngadto sa mga Rallos.

Matud ni Osmeña nga dili iyang kagustohan ang pagbayad sa mao nga kantidad kay gani wala siya masayod niini tungod kay ang kuwarta igo lang gi-garnish gikan sa bangko tungod sa kamandoan sa hukmanan.

Ang kabanayan ni Fr. Vicente Rallos naningil og bayad sa gamay kaayo’ng yuta nga nagamit isip public road diha sa Barangay Sambag II tungod kay matud pa ang dakbayan wala gayud mobayad sa kinatibuk-an nga kantidad.

Ang kaso nga gipasaka sa kabanayan ni Rallos miabot sa Supreme Court ug mimando nga ang dakbayan sa Sugbo kinahanglang mobayad og P133 milyones tungod sa nagtumpi-tumpi nga mga interest sa wala matiwas pagbayad nga presyo sa yuta.

Si mayor Rama wala gayud mobayad sa kantidad ug gipugngan ang korte nga ma-garnish ang kantidad gikan sa mga bangko nga gidepositohan sa dakbayan sa ilang salapi.