‘Toledo Padaganan og Daghang Bus Pasaheroan’

Gibutyag ni Regional Director Ahmed Cuizon sa Land Transportation Franchising and Regulatory Board (LTFRB)-7 nga padaganan nila og daghang bus ang rota sa syudad sa Toledo, lungsod sa Tuburan ug Pinamungahan karong adlawa ug ugma sa Myerkules Santo.

Kini agi og pagtuman sa hangyo ni Gov. Hilario Davide III sa ilang buhatan.

Daghang Natanggong

Matud pa ni Cuizon nga base sa assessment sa gobernador nga sa milabayng pasko sa miaging tuig ug pagsugat sa bag-ong tuig, kulang kaayo ang mga bus pasaheroan sa naasoy nga rota hinungdan nga ubay-ubay ang mga pasahero nga natanggong.

Pagsiguro nga dili na masubli ang maong sitwasyon, si Cuizon miingon nga ilang dugangan og bus pasaheroan ang maong rota.

Kini pinaagi sa paghatag og special permit sa mga bus operator nga may igong sakyanan nga makadagan paingon sa Toledo, Tuburan ug Pinamungahan.

Gitug-an usab ni Cuiuzon nga mao usab kini ang mga rota nga ilang giluwatan og special permit sa 50 ka mga Ceres bus sa Vallacars Transit Inc.

Gawas niini, si Cuizon nagkanayon nga moluwat usab sila og special permit sa mga bus gikan sa laing probinsiya aron mo-divert og rota dinhi sa lalawigan.

Kini aron pagsiguro sa sayon nga pagsakay sa mga pasahero sa nagkadaiyang mga lungsod ug syudad dinhi sa laliwgan sa Sugbo.

Apan iyang gitataw nga ang maong mga bus nga nahatagan og special permit maapil gihapon sa ilang pang-inspection sa terminal uban sa abag sa Land Transportation Office (LTO)-7 nga gipangulohan ni Regional Director Arnel Tancinco.

Nasayran nga ang LTFRB-7 ug LTO-7 nagtambayayong sa hugot nga pang-inspection sa mga bus nga maglakip sa mga dokumento hangtud na sa mga preno, suga ug uban pang mga bahin sa sakyanan.

Kini sa pagsiguro nga luwas ang mga pasahero gikan sa mga aksidente sa kadalanan niining panahona.

Image Credit: www.happysteps.net