Tikasang Kawani sa LTO Gibaharang Silotan

Mibahad si Land Transportation Office (LTO-7) Regional Director Arnel Tancinco nga ang iyang buhatan andam nga mopaimbestigar sa mga kawani sa LTO nga dili magtarong sa paghatag og sukli sa bayad sa mga motorista nga buot mo-renew sa ilang drivers license o rehistro sa motor o sakyanan.

Gihimo ni Tancinco ang maong bahad human siya makadawat og mga reklamo sa mga motorista nga wala sila suklii sa ilang gibayad sa pagpa-renew sa ilang lisensya sa LTO SM branch sukad sa miaging tuig.

Matud pa ni Tancinco nga sugdan dayon niya ang subsob nga imbestigasyon sa higayon nga makadawat pa ang iyang buhatan og dugang reklamo.

Iyang gisaad nga ang iyang buhatan dili magpanuko sa pagpahamtang og silot niadtong mga kawani sa LTO kun mamatud-an nga nakahimo sa maong salaod.

Iyang gihulagway nga usa ka seryosong kahiwian ang maong salaod hinungdan nga kun ang mao unya nga kawani casual, hayan dili na kini
mahatagan og renewal, ug kun organic member, pasakaan kini og kaso og ibalhin og laing buhatan.

Dugang pa niya nga ang pagsumpo sa maong kabuang sulod sa LTO maoy usa sa mga lakang sa iyang administrasyon sa pagpahingusog sa kampanya kontra korapsyon alang sa labing epektibong serbisyo publiko sa LTO.