Tigpayuhot og Mini nga Salapi, Nasikop

Midagsang na g’yud pag-ayo ang mga mini nga kuwarta dinhi sa dakbayan sa Sugbo tungod sa sunod-sunod nga pagkasikop sa mga tawo nga buot mopayuhot sa mao nga hinimo nga salapi.

Nadakpan sila si Morel Relente, 33, ug si Joel Bijante, 42, pulos mga minyo ug walay trabaho nga nagpuyo sa Barangay T. Padilla, dakbayan sa Sugbo.

Ang duha gikataho nga misulay pagpayuhot og P500 ngadto sa nagbantay sa usa ka tindahan apan nakabantay ang tindero nga si Michael Banggoy nga mini ang kuwarta nga gitunol sa usa sa duha ka tawo.

Buot unta mopalit og usa ka tray nga itlog sila si Relente ug Bijante apan ang tindero nakamatikod nga hinimo ang kuwarta nga ibayad unta sa duha mao nga dali sila nanawag og tabang aron madakpan ang mga suspek.

Matud ni Banggoy nga gigamitan niya’g flashlight apan wala gayud mo-reflect ang dibuho nga tawo nga maoy secret marker sa kuwarta mao nga misamot ang iyang pagtoo nga mini ang salapi nga gitunol kaniya.

Si Relente nagpatulo na lang sa iyang mga luha diha nga gidala sila didto sa Theft and Robbery Section (TRS) sa Cebu City Police Office (CCPO). Matud niya nga gisugo lang sila sa usa nila ka amigo nga mopalit og itlog ug gihatag ang P500.

Sa miaging semana, ang kapolisan nakahimo usab og sunod-sunod nga pagsikop sa mga tawo nga buot mopalusot og mga mini nga salapi. Kini maoy nakapahugot sa pagduda nga aduna g’yuy buhatanan og mga mini nga kuwarta dinhi sa Sugbo.