Tiggamitan og Gidili’ng Drugas Nagkadaghan

Nagkadaghan na g’yud ang mga tiggamitan og gidiling drugas nga mga kawani sa barangay nga nadiskobrehan tungod sa subsob nga drug testing nga gipahigayon sa City Office for Substance Abuse Prevention (COSAP).

Upat ka kawani sa Barangay Poblacion, Pardo ang namatud-an nga positibo sa kinalit nga drug test nga gihimo kanila kagahapon, Lunes.

Usa sa upat ka kawani nga namatud-ang adik, tiguwang na nga drayber sa barangay. Ang laing duha mga garbage loaders ug ang usa nagtrabaho isip support staff.

Swerte hinoon ang mao nga mga kawani kay si Pardo Barangay Captain Althea Lim miingon nga dili pa niya taktakon sa trabaho ang mao nga mga kawani sa barangay.

Matud ni Lim nga hatagan usa niya og higayon nga magbag-o ang mao nga mga kawani.

Si Dr. Alice Utlang nga maoy hepe sa City Office for Substance Abuse Prevention (COSAP) miingon nga aduna sila’y tulo ka buwan nga gitawag og Out-Patient Treatment (OPT) ngadto sa mga drug users.

Matud ni Utlang nga wala gayud siya malipay nga halos tanan nga barangay nga mahimoan nila og surprise drug test duna g’yud mga kawani nga mamatud-an nga tiggamitan og gidili nga matang sa drugas.

Gipakalitan sa mga sakop sa COSAP og drug test ang 92 ka kawani nga didto gitigum ni Kapitan Lim sa barangay hall kagahapon sa buntag. Matud ni Lim nga aduna pa’y 14 ka kawani sa Pardo nga wa mahimoi og drug test kagahapon.

Si Kapitan Lim miingon nga ang upat niya ka kawani nga napositibo pahimoan niya og subli nga drug test ug kun sila mapositibo gihapon paglabay sa pipila buwan, anha na sila pangtaktakon sa trabaho.

Sa laing bahin, gidayeg ni Utlang ang kapitan sa Barangay Mabolo nga si Rey Ompoc. Gipa-drug test usa sa kapitan ang walo ka aplikante sa trabaho sa barangay aron pagsuta kun sila dili ba drug users.

Wala mosipyat ang kabalaka ni Ompoc kay namatud-an ni Utlang human sa drug test nga duha sa mao nga mga aplikante ang adik sa gidili nga matang sa drugas.

Gusto ni Utlang nga ang gihimo ni Ompoc sundon usab sa ubang opisyal sa kabarangayan aron malikayan nga maka-hire sila og mga drug users.