Tiggamit og ‘Skate Board’ Dakpon Na

Naglaum ang mga batan-on nga mahiligon sa skate board nga kabutangan sila og lugar sa kagamhanan sa dakbayan sa Mandaue nga ilang kaduwaan og skate board.

Ang ilang paghinaut mitumaw human ipalabang ang ordinansa ni Konsehal Elstone Dabon nga nagdili sa mga tiggamit og skate board sa pag-skate sa bisan asang dalan sa dakbayan aron paglikay sa aksidente.

Gipangamahanan ni Konsehal Dabon ang maong ordinansa nga gibase sa mga aksidente nga nahitabo nga miangin og mga kinabuhi.

Nasuta nga pinaagi sa paggamit og skate board, usahay makiglumba pa kini sa mga sakyanan nga mobadhas sa karsada busa risgo kaayo ang magsakay niini nga walay maayong depensa sa kaugalingon.

Ang maong ordinasahon gitakdang tukion unya sa ilang regular session alang sa 3rd reading o katapusang pagbasa niini.

“As a step to lessen these kinds of misfortunes, it is better to regulate the use of roller skates, roller blades and roller boards on all public roads within the city’s jurisdiction, where big trucks and all types of motorized vehicles pass,” nagklanayon ang maong ordinansahon.

Kon kaaprobahan kini, higpit na nga bantayan sa mga tinugyanan sa Traffic Enforcement Agency of Mandaue (TEDMAN) ang mga kadalanan aron dakpon ug pasakaan og kiha ang malapason.

Ang maong ordinansa naglatid og multa nga P500 apan dili molabaw sa P1,000 o pagkabilanggo og 10 ngadto sa 15 ka adlaw subay usab sa luwatan nga hukom sa korte batok sa mamatud-ang molapas sa balaod.

Ang roller skates, roller blades o skate board sa madakpan diha-diha sakmiton kini sa mga traffic enforcers ug itugyan ngadto sa Department of General Services.

Apan ang mga batan-on nga tiggamit og skate board milaum lang gihapon nga gahinan sila og lugar sa kagamhanan nga magamit nila alang sa ilang kalingawan.

Image Credit: www.wikihow.com