Tiggama og Mini nga Salapi, Nasikop

●Ordinaryo ra nga papel ang gigamit ni alyas ‘Sonny Opaw’ sa pag-imprinta og mini nga kwarta sulod sa internet cafe.

Nadakpan sa kapolisan ang usa ka kusinero nga nag-sideline pagpalusot og mga mini nga kwarta nga anha ra diay niya ipa-imprinta sa mga Internet Café ug dayon ibaligya kini sa ubos nga kantidad.

Si Nicolas Hererra, 54, ug naila nga Sonny Opaw diha sa Barangay Day-as, dakbayan sa Sugbo, gidakop sa mga sakop sa Regional Intelligence Division (RID) ug nasakmitan og daghan nga mini nga kwarta.

Sa milabay’ng mga adlaw, ang kapolisan nakasikop og mga tawo nga mipayuhot og mini nga kwarta. Sa imbestigasyon nahibaw-an nga didto nila kini napalit ni Sonny Opaw.

Matud pa nga ang dinakpan mobaligya sa iyang pinahimo nga kwarta sama sa P500 nga ibaligya ra og P50, ang P1,000 ibaligya usab og P100, ang P100 ibaligya ra og P20, ug ang tibuok P200 ibaligya usab og P40.

Nagpasabot nga kadto’ng mga tawo nga mabaligyaan ni Sonny Opaw makaganansya g’yud kun mapalusot nila ang mini nga kwarta nga gipalit nila sa barato nga kantidad.

Ang kapolisan mihimo og entrapment operation ug misugo’g tawo nga mopalit kunohay og mini nga kwarta gikan ni Sonny Opaw. Diha nga mibaligya na, gidakop dayon siya sa mga polis.

Nakuha sa kapulisan ang unom ka mini nga ‘tag 500 pesos, tulo ka 200 pesos, unom ka 100 pesos, 6 ka 1000 pesos ug nga wala pa magunting nga mga bond paper nga ‘tag 500 pesos ug 81 ka ‘tag 100 peso.

Nahibaw-an nga ordinaryo ra g’yud nga papel ang gigamit ni Sonny Opaw sa pag-imprinta og mini nga kwarta.

Wala pa ibutyag kun unsa nga internetan ang gipaimprintahan ni Sonny Opaw sa mga mini nga kuwarta. Matud sa suspetsado nga gisugo ra usab siya sa laing tawo apan wala siya mobutyag sa ngalan.

Gani ang dinakpan miingon nga may igsuon og polis nga iyang silingan nga nalambigit gihapon sa susama nga binuang.

Matud pa nga adunay uban nga mga tawo nga gikan sa silingan nga mga probinsya nga moanhi pagtuyo sa Sugbo aron mopalit gikan ni Sonny Opaw og mga mini nga salapi.

Ang gihimo ni Hererra nga naila nga Sonny Opaw usa ka kalapasan sa Article 168 sa Revised Penal Code. Ang Bangko Sentral ng Pilipinas kaniadto’ng miagi’ng adlaw miangkon nga apil sila nakadawat og report nga mikatap na ang mga mini nga salapi dinhi sa rehiyon.