Thousands Avail Free Services In Labangon

Liboan ka mga molupyo sa Barangay Labangon nga usa sa 80 ka barangays ning syudad ang natabangan sa mga libreng serbisyo nga alang sa tanan karong adlawa Abril 14, 2016 Huwebes nga gipahigayon sa Sitio Santa Ana pinaagi sa ”City Hall At Your Doorstep” kon “Piyesta sa Pagpangalagad” sa kagamhanan ning dakbayan.

Ang programa inisyatiba ni Cebu City Mayor Michael Lopez Rama nga natukod niadtong tuig 2010 diin ang 22 ka mga departamento sa City Hall maghatod sa mga libreng serbisyo ngadto paduol sa mga katawhan ngadto usab sa ilang tagsa-tagsa ka mga barangay.

Ang maong programa nagahatag ug libreng batakang panerbisyo alang sa tanan sama sa kosultasyon sa rehistro sa pagkatawo, pagpakasal, ug pagkamatay; mass feeding ug timbang sa mga kabataan; medikal nga konsultasyon; pag-ibot sa ngipon; pagpanglimpyo sa mga kanal ug drainage; pagpanaod ug pagpang-ayo sa mga street lights; ug pagrehistro, kapon ug bakuna sa mga iro ug iring.

Gitanyag usab ang mga batakang serbisyo nga mao ang laboratory services sama sa blood typing ug blood sugar testing; pagpanghatag ug mga seedlings nga itanumay sama sa prutas ug utanon; paghatag ug nagkadaiyang mga tambal ug bitamina; ug libreng seminar sa epekto sa pagamit ug ginadiling druga, traffic rules, environmental awareness, fire prevention, mga kalihokan ug kalambuan sa dakbayan, ug uban pa.

Atol sa pakighinabi sa BARUGG News, matud ni Cresencia Taran, 34 ang edad, usa lamang sa natabangan sa programa nga, “Dako gyod among pasalamat ni Mayor Rama nga naglantaw siya sa kaayohan sa katawhan pareha namo nga natabangan mi, maayo ni kay libre check-up naa pay libreng tambal.”

Dugang pa ni Cresencia kinsa nagpakonsulta uban sa iyang 3 ka mga anak nga angayan gyod ipadayon ang programa ni Mayor Rama aron mas daghan pang matabangan matag barangay hilabina ang mga kabus.

Bisan pa ug walay suporta sa mga opisyales sa naasoyng barangay, sa kinatibuk-an nagmalampuson ang pagpahigayon sa kalihokan diha sa paghatag ug libreng serbisyo nga alang gyod sa tanan. (Cebu City Public Information Office PIO/Greggy Jiggs P. Senados)