Testimonya sa Konsehal, Mopalig-on sa Kaso Batok sa Nawala nga mga Kahoy

Si Cebu City Councilor Dave Tumulak gamiton sa kadagkoan sa Department of Environment and Natural Resources (DENR)-7 pagpalig-on sa gipasaka nila nga kaso batok sa WT Construction nga maoy gikatahong nangibot sa mga kahoy gikan Sergio Osmeña Road.

Matud ni Eddie Llamedo, tigpamaba sa DENR-7, nga adunay mga interview sa media ni Konsehal Tumulak nga nagkutlo sa iyang pamahayag sa nakita niya sa CCTV footage nga ang WT Construction maoy nanguha sa mga kahoy.

Ang DENR mipasaka na og kaso didto sa fiskaliya batok sa construction company ug miisyu og cease and desist order (CDO) nga nagmando paghunong sa pagpangibot sa mga kahoy taliwala sa karsada nga ilang gisemento.

Matud ni Llamedo nga mahimo lang kini nga bakwion ang CDO kun matuman na sa Department of Public Works and Highways (DPWH) ang gipanglatid nga mga kondisyon.

Usa sa mga kondisyon nga kinahanglang mananom sila og 7,900 ka kahoy hulip sa nawagtang nga 79 ka puno-an sa mga Fire Trees gikan sa center-island sa Osmeña Road.

Ang DENR-7 nagpatabang na NBI-7 aron makit-an ang nangahanaw pa nga mga kahoy ug aron pagpalig-on pa sa ilang kaso nga gipasaka batok sa WT Construction.

Image Credit: cebudailynews.inquirer.net