Team Rama Nangharus Atol sa BCLP Election

Giharus g’yud sa mga konsehal nga alyado sa Team Rama ang tanang katungdanan sa Barangay Councilors League of the Philippines (BCLP)-Cebu City Chapter atul sa election kaniadtong Sabado sa hapon.

Si Konsehal Raymond Garcia, anak ni kanhi mayor Alvin Garcia mao na ang bag-ong presidente sa BCLP-Cebu City Chapter kay gibiyaan niya og 91 botos ang iyang kontra nga si Kasambagan Barangay Konsehal Franklyn Ong.

Nakakuha og 306 botos si Garcia samtang 215 botos lang ang nakuha ni Ong nga alyado sa Bando Osmeña Pundok-Kauswagan (BOPK).

Si Konsehal Garry Lao sa Barangay Tejero nga gusto unta nga magpapili pag-usab isip secretary ubos sa han-ay ni Ong miingon nga ang mga konsehal nga alyado sa Team Rama gipanghatagan og tag P500 nga gift certificate sa Biyernes ug P2,000 nga cash sa adlaw sa eleksyon.

Si Mayor Michael Rama ingon sa wala kaayo ganahi nga mohatag og tubag sa mao nga isyu nga gibutyag ni Lao.

Matud ni Lao nga sila’ng tanang grupo ni Ong midawat na lang sa ilang kapildehan og naglaum nga unta tumanon ni Garcia ang gisaad niya atul sa kampanya.

Si Garcia misaad nga hangyoon niya si Mayor Rama nga dugangan ang binuwan nga additional honorarium sa mga opisyal sa barangay ug nga mohimo siya og health programs sa mga sakop sa ilang kahugpongan.

Matud ni Garcia nga lihukon dayon niya ang katumanan sa iyang mga panaad sa mga kauban niya nga konsehal sa kabarangayan sa dakbayan.