Talisay Anda Magbukas sa Food Production Facility, Boardwalk Gikan sa BFAR

Buksan didto sa Talisay, Anda Bohol ang usa ka boardwalk ug subhan ang bag-ong food production house sa Talisay Fishermen’s Association (TAFIAS) samtang gidasonan sa kagamhanan ang mga paningkamot sa mga taga didto nga makakita pag dugang panginabuhi-an.

Ang TAFIAS ilado na kaayo sa ilang tilapia chips, o fish crackers nga mugna sa tilapia. Gawas pa niana, produkto na usab sa TAFIAS ang mga produktong pagkaon nga gikan sa paw o taro based products sama sa ice cream, cakes, ang nagkasikat na nga coconut burger ug ang tanlas nga terna tea.

Apan, tungod sa panginahanglang maseguro ang kalimpyo sa pag-andam sa pagkaon, gitukod na ang food production house nga gipundohan sa Bureau of Fisheries and Aquatic Resources (BFAR), matud ni Anna Mainit, opisyal sa TAFIAS.

Kahinumduman nga ang TAFIAS benepisaryo usab sa kagamhanan sa Estonia pinaagi sa maayong kabubot-on sa banay nga Gurney, kinsa naghatag kanila sa mga bag-ong teknolohiya sa pag[angluto.

Gawas niana, natabangan usab ang TAFIAS sa pagtukod og gambalay nga ginama sa binotelya nga bonbon ug gimugna aron makalahutay sa mga hagit sa katalagman.

Niining bag-o, laing bag-ong imprastraktura alang sa turismo ug lingawlingaw ang buksan sa Talisay Fishermen’s Association (TAFIAS) sa Sabado, Disyembre 17, human sa pagsubo sa Food Production House. Buksan sa TAFIAS ang AndaKidz boardwalk sa Sabado, isip labing bag-ong tanyag sa mga mangingisda sa Talisay ngadto sa mga turista.

Ang TAFIAS usa sa mgha benepisaryo sa BFAR human kini nangayog abag dala sa kawad-on nga naglapad didto. Gawas pa niana, napun-an pa ang abag pinaagi sa pagbukas karon sa AndaKidz boardwalk aron mas dali na alang sa mga mangingisda ang pagsuhot sa katunggan paingon sa lawod.

Mahimo na usab ang boardwalk nga gamiton sa mga turista nga buot mosubay sa mga katunggan sa Talisay aron makita ang mga kinhason ug sinati-on ang mga pamaagi sa pagpanginhas niini. (rac/PIA-7/Bohol)