Tabangan ni Mayor JVR ang Nangamatay sa Imburnal

Tabangan sa mayor sa dakbayan sa Talisay ang pamilya sa duha ka tawo nga namatay human malanag sa grabe kabahu nga kanal sa merkado sa Barangay Tabunok nga ilang gilimpyohan Huwebes sa hapon.

Namatay ang duha ka tawo kay nakahanggap sila og makahilo nga “methane gas” samtang sila nanglimpyo sa hugaw kaayo nga kanal.

Kalit lang nalum-oy ug nalumos sa lawom nga mga tubig ug lapok ang mag-agaw nga sila si Brendon Cabanes, 26, taga Barangay Tangke, ug si Romeo Cabanes, 27, taga Sitio Molave, Tabunok human sila makahanggap sa methane gas.

Duha ka laing trabahador nga sila si Lemuel Macaraya, 30 ug Wilson Campo, 26, pareho nga taga Sitio Mananga sa Tabunok misuway unta pagluwas sa mag-agaw’ng Cabanes apan sila na usab ang naglisod sa pagginhawa.

Sila si Macaraya ug Campo gidali sa pagdala sa Talisay City District Hospital.

Ang grupo sa mag-agaw’ng Cabanes maoy gikuha ni Talisay City Engineer Audie Bacasmas aron limpyohan ang hugaw na kaayo nga kanal, ilabi na ang imbornal nga gikan sa merkado.

Matud ni Engr. Bacasmas nga ta’g P300 ra ang ilang sweldo sa tibuok adlaw nga pagtrabaho nga moubog sa tubig sa kanal nga taga hawak ang lapok aron pagkuha sa mga lapok ug nadugta nga mga sagbot.

Si FO3 Guiller Pegarido nga dali nga mihimo og imbestigasyon sa maong hitabo mitug-an sa mga sakop sa media nga si Brendon ang giingon nga unang nalipong tungod sa methane gas nga iyang nahingos.

Matud pa nga natumba si Brendon ngadto tubig sa kanal nga lapokon ug nalumos.

Ang iyang ig-agaw nga si Romeo misuway unta pagluwas ni Brendon apan nadakin-as ug nahagbong usab sa kanal ug napantok ang ulo sa semento mao nga nakuyapan ug nalumos.

Ang duha ka laing trabahador nga sila si Campo ug Macaraya nakakita sa gidangatan sa ilang mga kauban mao nga naninguha sila nga matabangan ug maluwas ang mag-agaw’ng Cabanes.

Matud sa mga nakakita nga gisuwayan unta nila ni Campo ug Macaraya sa pagbitik ang mag-agaw pinaagi sa pisi apan nangalipong ‘sab sila tungod sa nahanggap nila nga methane gas.

Ang imbestigador miingon nga ang nadugta na nga mga basura mokamugna kini og makahilo nga gas sama sa “methane” og makapatay kun kini mahanggap sa tawo.

Adunay mga napulo ka tiil ang giladmon sa kanal paingon ngadto sa imbornal ug tungod kay wala makahungaw ang baho sa nadugta nga mga hugaw, nakamugna kini og makahilo nga gas.

Mga tulo ka semana na nga ang grupo ni Cabanes naglimpyo sa hugaw kaayo nga kanal ug gibana-bana nga mahuman na unta kini karong semanaha.

Si Konsehal Danny Caballero miingon nga si Talisay Mayor Johnny De los Reyes dali nga miadto usab sa dapit nahitaboan ug sa ospital.

Ang mayor matud pa misaad nga mohatag og tabang sa mga biktima.