Suspetsadong Rapist Nasikop

●Nadakpan sa gilusad nga follow up operation ang maong suspetsado sa gipuy-an niini nga bunk house, sunod sa pagbalhog niini.

Nadakpan sa kapolisan ang lalaking suspetsado sa paglugos sa usa ka dalagita nga tinun-an sa Sector 5, Barangay Pagsabungan, dakbayan sa Mandaue alas 9 pasado ang takna sa miaging gabii.

Ang nadakpan mao si Ronilo Almajabai, 23, ulitawo nga taga Barangay San Isidro, Dakbayan sa Talisay ug temporaryong nagpuyo sa bunk house nga giabangan niini sa maong lugar.

Si PO2 Janice Mag-asin sa Women’s Section sa kapolisan sa Presinto 3 sa Mandaue City Police Office (MCPO) miingon nga kuyog ang inahan sa biktima sa pagtaho sa ilang buhatan human sa maong hitabo.

Dugang pa niya nga ilang nadakpan sa follow up operation ang maong suspetsado didto sa gipuy-an niining bunk house sa maong lugar busa ila dayong gibalhug sa detention cell.

Matud pa ni PO2 Mag-asin nga gisugo sa inahan ang biktima sa pagpakuha sa bag nga gibilin sa tulunghaan apan nahibulong siya kay dugay kining nahiuli.

Naabot ang biktima niana nang alas 9:00 na pasado sa gabii ug dihang gisukitsukit sa inahan mitug-an kini nga gidala siya sa suspetsado didto sa bunk house diin didto gipahimuslan ang iyang pagkababaye.

Si PO2 Mag-asin midugang nga ang biktima miasoy nga gipahapit siya sa sulod sa bunk house nga gipuy-an sa suspetsado ug gipasulod sa kuwarto ug didto gipahimuslan sa suspetsado.

Si PO2 Mag-asin miingon nga ilang gipaubos sa medical examination ang biktima ug nasuta nga positibo ang resulta nga napahimuslan gayod ang pagkababaye niini.

Ang kasong kalapasan sa Republic Act 7610 o child abuse ug pagpanglugos maoy ipasaka batok sa suspetsado.