Suspek sa Pagpatay sa Pag-umangkon ni VM Labella Nadakpan

Ang miangkon nga nagpatay sa pag-umangkon ni Cebu City Acting Mayor Edgardo Labella ug matud pa nalambigit usab sa daghang pagpamatay nadakpan na sa kapolisan kagahapon sa kaadlawon.

Si Manuel Richard Corominas, 35, nga naila sa angga nga Pachoy nadakpan sa kapolisan dihang miduaw siya sa iyang pamilya sa Barangay Day-as alas tres sa kaadlawon sa adlawng Dominggo.

Matud sa mga polis nga si Pachoy nasakmitan nila og kalibre 45 nga pistola, usa ka .38 kalibre nga revolver ug usa ka granada.

Ang mga sakop sa Pari-an Police Station ug City Intelligence Branch (CIB) nga gipangulohan ni Superintendent Romeo Santander nakadawat og kasayuran nga si Pachoy mag-ulian sa iyang gipuy-an sa Barangay Day-as panahon sa lawom na nga gabii.

Mga polis nga nagpatuo lang nga ordinaryo’ng sibilyan gidistino na daan sa dapit nga agianan ni Pachoy paingon sa gipuy-an sa iya’ng pamilya.

Kagahapon sa kaadlawon may nakatug-an sa kapolisan nga si Pachoy nasigpatan na nga naglakaw sa Sitio Upper Day-as nga adunay dala nga granada ug armas.

Human masuta sa kapolisan nga armado si Pachoy, abtik nila kini nga gidakop samtang wala pa makabonot sa iyang giluklok nga armas.

Si Pachoy miangkon sa mga reporters nga siya ang mipusil ug mipatay ni Rolan Colina nga pag-umangkon ni Acting Mayor Labella tungod sa panagbikil bahin sa drugas og kuwarta.

Giangkon ni Labella nga ang iyang pag-umangkon nalambigit gayud sa bisyo sa gidili nga matang sa drugas sa wala pa kini patya sulod sa usa ka drug den sa Day-as pipila ka semana ang milabay.

Ang kapolisan mitug-an nga si Pachoy usa usab sa nalambigit niadto’ng sunod-sunod nga pagpangilog og sakyanan didto sa syudad sa Talisay ug dinhi sa dakbayan sa Sugbo diin usa sa tag-iya’g sakyanan gipusil.

Ang kapolisan sa Talisay mitug-an usab nga karong adlawa pasakaan nila og kaso si Pachoy kay mao kini ang mipusil ug mipatay sa iyang kaugalingong amigo ug miangol sa laing kauban kay midumili pagkuyog sa lakaw sa ilang grupo.

Si Pachoy wala moangkon ug kalambigitan sa nahitabo nga pagpangilog og sakyanan ingon man niadtong pagpamusil didto sa Talisay ug wala usab niya angkona ang armas nga giingonng nakuha gikan kaniya.

Matud ni Pachoy nagplano na g’yud unta siya nga motahan kay gikapoyan na siya nga magtago-tago nga bisan asa ra siya makatulog nga maghanig ra og karton.

Adunay mitambag ni Pachoy nga motago sa layo nga lugar apan matud niya mingawon siya sa iyang pamilya, ilabi na dos-anyos niya nga kamanghorang anak.