Supply sa Kuryente Kritical, Solar Panel Gisugyut

Gibutyag sa Visayan Electric Company (VECO) nga nagpabiling kritical ang supply sa kuryente dinhi sa Metro Cebu area tungod sa kainit karon sa panahon.

Matud pa sa tigpamaba sa VECO Theresa Sederiosa nga gamay ra kaayo ang power reserved karong panahona tungod sa kadako sa demanda sa kuryente.

Nagkanayon si Sederiosa nga gipangandaman na unta nilang daan ang pagsaka sa demanda sa kuryente niinging panahon sa ting-init tungod kay daghan man ang mogamit og appliances sama sa refrigerator, bentilador ug mga air condition units nga kusog kaayong mokonsumo og kuryente.

Gitumbok niya nga angyan unta nga 50 ka megawatt ang power reserved nga ihatag sa National Grid Corporation of the Philippines (NGCP) dinhi sa Metro Cebu tungod sa kadaghan sa mga edipesyo nga nagkinahanglan og dakong power supply.

Hinuon gipahibawo ni Sederiosa nga ang VECO mihimo usab og lakang aron makatabang sa pagmenus sa demanda sa kuryente pinaagi sa pagbutang og solar panel niadtong mga residente nga buot magbaton niini.

Iyang giklaro nga gisugdan na nila ang pagpanaod niini sa pipila ka mga kabalayan ug gani ubay-ubay na usab nga mga konsumedor ang nakatestigos nga mikunhod gyud og 10 porsyento ang ilang bayranan sa kuryente matag bulan.

Midugang si Sederiosa nga mahimo usab nga ilang paliton ang mapundo nga power supply niini aron ikapuno ngadto sa mga area nga nanginahanglan og dugang power supply.

Ang mga konsomdor nga interesado sa nahisgutan solar panel mahimong maka-apply sa buhatan sa VECO, matud ni Sederiosa.