Summer Grassroots Sports Training Program 2016

Gipalapdan pa sa kagamhanan ning dakbayan nga gipangulohan ni Mayor Michael Rama pinaagi sa Cebu City Sports Commission ang Summer Grassroots Sports Training Program karong tuiga.

Atol sa “City Hall at Your Doorstep” nga gipahigayon karong adlawa Marso 15, 2016 Martes didto sa Barangay Duljo Fatima Sports Complex, gipasabot ni Alex Sillos kawani sa Cebu City Sports Commission nga magsugod ang programa sa Sports karong Abril 18 hangtod Mayo 6.

Dugang gipasabot niini nga ang programa alang sa mga kabataan nga nag-edad ug 6 hangtod 16 anyos.

Adunay 17 ka mga nakalain-laing sports nga pweding salmotan sa mga liboan ka mga kabataan. Naglangkob niini ang Basketball, Arnis, Archery,Boxing, Badminton, Chess, Dancesports, karatedo, Futsal, Sepak Takraw, Softball, Taekwondo, Table Tennis, Track and Field, Volleyball, Weightlifting, ug Scrabble.

Samtang, libre lamang ang pagsalmot sa programa ug ipahigayon kini sa nagkadaiyang gymnasiums ug tunghanan sa mga kabarangayan nga naglangkob ning syudad.

Gibana-banang mokabat sa 5 Mil ka mga kabataan ang mosalmot sa tinuig nga kalihokan. Ipahigayon usab ang kulminasyon sa programa karong Mayo 7 ning tuiga ngadto sa Cebu City Sports Institute.

Alang sa dugang kasayuran, mamahimong mobisita sa buhatan sa Cebu City Sports Commission nga nahimutang sulod sa Cebu City Sports Complex o motawag sa telepono 520-8839. (Cebu City Public Information Office PIO/Greggy Jiggs P. Senados)