Sugbo Gusto Himoon’ng “Adopted Town” ang Palo, Leyte

Lima ka konsehal sa dakbayan sa Sugbo misugyot nga ang lungsod sa Palo, Leyte himoon nga “adopted town” sa siyudad aron tabangan nga makabarug kini pagbalik human ilampornas sa bagyo’ng Yolanda.

Kini maoy sugyot nila ni Konsehal Dave Tumulak, Nendel Hans Abella, Mary Ann delos Santos, James Cuenco ug Gerardo Carillo nga gihimo nila pinaagi sa usa ka resolusyon.

Ang lakang pag-adopt sa Palo, Leyte aron tabangan kini pag-ayo sa dakbayan sa Sugbo gipugngan usa kay ang mga konsehal nga sakop sa City Council gusto masayud sa dugang detalyi.

Apil sa gusto nga mahibaw-an sa mga konsehal kon unsay kaakuhan sa dakbayan sa Sugbo kon uyonan sa City Council nga himoong adopted town ang lungsod sa Palo.

Nahukman sa mga konsehal nga ipatawag nila ang kadagkoan sa Local Disaster Risk-Reduction Management Office (LDRRMO) aron magpakisayud sa dugang kasayuran.

Si Konsehal Dave Tumulak miingon nga may pasiuna na nga panagsabot-sabot tali sa mga opisyal sa dakbayan ug sa obispo sa simbahang katoliko sa Palo, Leyte kabahin sa pagtabang sa ilang mga lumulopyo.

Matud ni Tumulak nga kon mahimo na nga “adopted town” sa dakbayan sa Sugbo ang lungsod sa Palo, Leyte, tabangan kini pinaagi sa pagpadala og mga makinarya ug uban pa nga kinahanglanon.

Kini aron nga mapadali nga makabangon ang maong lungsod human gilampornas sa kusog kaayong hangin nga Yolanda kaniadtong Nobyiembre 8 sa milabayn’g tuig.