Suga Makapanindot sa Buwak

Motoo ba kamo nga ang mga tanom nga buwak magkinahanglan ‘sab diay nga sug-an og electric light inigsawop na sa adlaw?

Daghan ang wala masayod niini apan aduna na’y pipila ka tigtanom og mga buwak sa kabukiran sa Sugbo nga nagsugod na sa pagbutang og suga sa ilang flower farm inigsawop sa adlaw.

Si Cebu City Agriculturist Joelito Baclayon mipasabot nga ang mga buwak magkinahanglan og kapin sa 13 oras nga kahayag aron angay ang mga kolor niini.

Tungod kay 12 ka oras ra man ang adlaw nga mohatag og dan-ag, matud ni Baclayon nga kini maoy rason nga dunay mga buwan nga dili kaayo makapagawas sa nindot nga kolor.

Tungod sa paggiya ni Baclayon sa mga mag-uuma, duna na’y mga tigtanom og buwak nga motuman sa iyang tambag og nakamatngon nga minindot ang ilang mga buwak.

Ang mga barangay nga daghan ang nananom og buwak mao ang Busay, Malubog, Bonbon, Sirao, Babag ug Pung-ol Sibugay.

Matud ni Baclayon nga pag-anhi ni Agriculture Secretary Proceso Alcala sa Sugbo kaniadtong miaging semana nasurpresa ang opisyal pagkakita nga duna diay mga yellow roses nga tanom diha sa kabukiran ning dakbayan.

Gibutyag ni Baclayon nga hinay-hinay niya nga gipasabot ang mga mag-uuma nga angay’ng mogamit na gayud sila og organic fertilizers sa pag-alima ug pagpatambok sa ilang mga tanom inay mga pinalit nga abuno.c