‘State of Calamity Preparedness’ Gideklarar sa Cebu

Ang tibuok dakbayan sa Sugbo gideklarar na kagahapon sa Cebu City Council nga ubos sa State of Calamity Preparedness agi og pagpangandam sa nagsingabot nga bagyo’ng Ruby nga gikatakda nga moigo sa Central Visayas sugod ugma.

Si Konsehal Lea Japson maoy misugyot nga ideklarar ang dakbayan ideklarar nga ubos sa state of calamity preparedness aron makagamit kini sa iyang calamity budget kun adunay panginahanglan.

Ang mga weather forecasters miingon nga ang hangin sa bagyo’ng Ruby magdala og hangin nga 75 kilometros matag takna sa sentro og takus na kini nga makakuba og kabalayan.

Kun walay kausaban, gibana-bana nga karong adlawa makasinati na og uwan-uwan ug hangin ang Sugbo ug ubang bahin sa Central Visayas diin dagko usab ang mga bawod sa kadagatan.

Si Konsehal Dave Tumulak, ang presiding officer sa Local Disaster Risk-Reduction and Management Council, miawhag sa mga opisyal sa kabarangayan nga mangandam ‘sab ug palihukon na nila ang ilang mga Barangay Disaster Councils.

Giawhag usab ni Tumulak ang katawhan nga ilang pul-ongan ang mga sanga sa kahoy nga anaa sa palibot sa ilang kabalayan aron dili kini maluka kun kuso-kusohon na sa bagyo.

Si mayor Michael Rama mipaapud-apod usab og basahon sa lainlaing kabarangayan nga magtudlo sa katawhan kun unsay buhaton nila aron malikayan ang katalagman.

Matud ni Rama nga sa dili pa moabot ang bagyo, sigurohon g’yud nga lig-on ang kabalayan ug magpundo sila’g mga pagkaon sama sa pan, biscuit ug de lata.

Magpundo usab ug igong tubig nga mainom nga molungtad og tulo ka adlaw ug sigurohon nga adunay daghan pa’ng sulod ang LPG nga magamit sa pagluto’g pagkaon.

Dugang ni Rama nga kun moabot na ang bagyo magpabiling kalmado, maninaw sa radyo ug kun mag-brownout ipalayo ang kandila sa mga panapton.